УВЕР ЙОГЫН

Марий Эл Республик вуйлатышын грантшылан туризм конкурс иктешлалтын

Тений туризм областьыште Марий Эл Республик вуйлатышын грантшылан конкурс иктешлалтын. 

Сеҥыше-влакым кум номинацийыште палемденыт да кажныжлан 100 тӱжем теҥге гыч ойыреныт. «Марий Эл Республик кумдыкышто туризм обьектым ончыкташ ямдылымаш» номинацийыште сеҥышыш «Тӱвыра поянлыкым арален кодымаште полшышо обществе» организацийын республикысе региональный пӧлкаже лектын. Проект почеш ты оргнизаций Чарла кремльыште «Шонымашым шуктышо пушеҥгым» ыштынеже.

«Туризм сферыште эн сай рекламе-увер проект» номинацийыште илышыш шындараш келшен толшо шонымашлан Йошкар-Оласе историй тоштерын проектшым шотленыт. Тудо «Унам вашлийын моштышо Йошкар-Ола» маналтеш да марий рӱдолашкына толшо турист-влаклан увер шот дене полшаш виктаралтеш. Оласе тӱвыра учрежденийлаште, кочмо верлаште, вокзаллаште турист навигаций дене кылдалтше, кызытсе жаплан келшыше увертарымаш-влакым вераҥдаш шонат.

 А теве Морко районысо тоштер «Марий Эл Республикысе туриндустрий субьектын пашажым вияҥден колтымаш» номинацийыште ойыртемалтын. Тоштер пашаеҥ-влак районыштышт турист-увер рӱдерым почнешт. Тудын полшымыж дене шке турпродуктыштым темлаш тӱҥалыт.

 С.Носова.

Опубликовать в Одноклассники

Добавить комментарий