Звенигово оласе «Водник» стадионышто Провой кундемыште шочын-кушшо СССР спорт мастер Жанна Чубырина-Аистовам шарныме лӱмеш ече дене таҥасымаш эртен.
Ж.Чубыринан пелашыже Сергей Аистовын, тыгак спонсор-влак Андриян Сапожников ден Илья Шумковын ямдылыме медальыш да призышт верч 1, 3 да 5 километрыш 70 утла еҥ куржаш толын.
Оргкомитетын еҥже, судья Инна Сотникован каласкалымыж гыч, личный первенствым юношестве ийготан вич тӱшкаште, тыгак куржталме результат почеш пӧръеҥ ден ӱдырамаш-влак коклаште (тыштыже Звенигово районышто илыше Евгений Борисов ден Наталья Петрова ойыртемалтыныт) иктешлыме. Сеҥыше-влакым медаль, грамот да шере приз дене палемдыме. Тылеч посна «Виктория» СШОР ден Волжский районын командыжлан таҥасымаште чолгалыкым ончыктымыштлан кубок ден шере призым кучыктымо.
Таҥасымаште Кужмарий села гыч 5 ияш Владислав Коротков эн изи участник лийын, эн кугулан Звенигово ола гыч 76 ияш Василий Русинов шотлалтын.
М.ИВАНОВА.
Снимкыште: С.Аистов сеҥыше-влакым саламла;
эн кугу участник – В.Русинов.
И.Сотникован фотожо.