«Журавушка» ийготыш шудымо-влаклан социально-реабилитационный рӱдерыште Гимнастикын тӱнямбал кечыжлан пӧлеклалтше «Кумдан палыме гимнаст-влак почешышт ӱжыт» мероприятий эртен.
Рӱдерын воспитательже-шамыч оҥай презентацийым ямдыленыт. Тудын полшымыж дене йоча-влак пайремын историйже да йӱлаже, чемпион гимнаст-шамыч, нунын сеҥымашышт, гимнастикын пайдалыкше да моторлыкшо нерген шуко уым пален налыныт. Тыгак гимнастикын спортивный, художественный, эстетический, командный, цирковой, акробатический, уремысе видше-влакым ойыраш тунемыныт. Воспитатель-влак Художественный гимнастикын всероссийский федерацийжын пашаже да тудым вуйлатыше Ирина Александровна Винер-Усманова дене палдареныт.
Йоча-шамычат, манмыла, парымеш кодын огытыл: самырык гимнаст-влак пирамидым «чоҥеныт», обруч да мече дене куштен ончыктеныт.
Ушештарена, Гимнастикын всероссийский кечыже ий еда октябрьын пытартыш шуматкечынже палемдалтеш. Мероприятийын цельже – спортын тиде направленийжым кумданрак ончыкташ, калыкын тӱткышыжым сферын сеҥымашыж ден проблемыжлан ойыраш. Тудо тыгак кучемым таҥасымашлан, йоча секций-влаклан финанс велым полшаш ӱжеш.
Фотом Марий Эл Республикын Социальный вияҥмаш министерствыжын сайтше гыч налме.
М.ИВАНОВА.
