Марий Элыште Россий Федерацийын гимнже почеш флагым нӧлталме йӱла угыч илышыш пурталтеш. Эн ончычак тидым 25 апрельыште Йошкар-Оласе 11-ше №-ан лицейыште торжественный линейке годым ыштеныт.
Россий Федерацийын кугыжаныш флагшым нӧлташ почётный правам лицейын 11-ше классыштыже тунемше, кугурак класслаш коштшо-влакын ушемыштын председательже Максим Отмахов ден отличнице да интеллектуал модмашлаште сеҥыше Анна Канягиналан ӱшаненыт.
Ушештарена, тыгай тӱҥалтышым илышыш пурташ Россий Федераций Просвещений министр Сергей Кравцов темлен. Тудо палемден: тиде самырык тукымын патриотизм шӱлышыжым вияҥдаш полша.
Мероприятийыште Марий Эл образований да науко министр Лариса Ревуцкая лийын. Тудын мутшо почеш, кажне арня тӱналтыште элнан гимнже почеш кугыжаныш флагым нӧлтымаш республикысе школлаште поро йӱлаш савырнышаш.
Г.Кожевникова
