У ий – шукыштын ик эн йӧратыме пайремышт. Санденак чылан гаяк тудым изин-кугун вучат! Пиалеш, тиде пайрем толын шумешке жап койын шагалемеш! Ты амал денак таче ме тыланда тудым кузе вашлийме, мом ышташ кӱлмӧ, моло шотышто икмыняр каҥашым темлена.
Кузе вашлийман?
2021 ий — Ош але Кӱртньӧ Ӱшкыжын идалыкше. А ӱшкыж – сурт вольык, сандене тудо оза ден озаватын мӧҥгыштӧ улмыштым йӧрата. Тугеже у ийыште пиалан лийнеда гын, пайремым унаште, кафеште але рестораныште огыл, а мӧҥгыштӧ шке еш дене, лишыл еҥ, родо-тукым да йолташ-влак коклаште эртарыза. Тыге те тудын ӱшанжым суледа да утларак пагалаш тӱҥалеш.
Пайремыште аракам утыждене йӱаш тыршыман огыл — Ӱшкыж йӱын руштшым огеш йӧрате. Уке гын шушаш ийын чотак «туныктен» кертеш.
Мом ыштыман огыл?
Ӱшкыж вашкымым огеш йӧрате. Сандене чылажымат ончылгоч сайын шонен да ласкан ыштыман. Декабрьын пытартыш кечылаштыже пӧлекым да кочкыш йӧрварым ӧрткышыла налын куржталаш огыл манын, тидым ончылгоч ышташ тыршыза. Уке гын шушаш ийын озаже шыдешка да вес ийын илышышкыда тӱрлӧ удам «колтен» кертеш.
У ийым вашлийме годым ида кычкырле, нигӧ денат ида вурседыл, ида ӱчаше, иктыланат удам ида тылане — Ӱшкыж тидлан шыдешкен кертеш. А тудо, сырыкташ огыл гын, такшым ласка, тыныс илышым йӧратыше вольык. Сандене У ий пайрем годым чылашт дене тыматле лияш тыршыза.
Мом чийыман?
У ийым вашлияш мом чийыман? Тиде йодыш ик эн чот ӱдыр ден ӱдырамаш-влакым тургыжландара.
Пайремлан лӱмын чот шергакан вургемым налаш тыршаш нимолан. Ӱшкыж тидым огеш йӧрате. Лучо тыглайрак да шулдырак, но тыгодым ситыдымашдам петырыше, а моторлыкдам ончыктышо вургемым чияш. Тудо натуральный куэм гыч лиеш гын, эшеат сай!
Шарныза: вургем утыждене тошто да лавыран лийшаш огыл!
Могай тӱсан лийшаш?
Ош але Кӱртньӧ Ӱшкыжын идалыкше шуэш, тугеже вургем ош тӱсан лиеш гын, утларак келшен толеш. Тыгак ший тӱсанымат чиен кертыда.
Мом пӧлеклыман огыл?
Тений лишыл еҥ ден йолташ-шамычлан утыждене шергакан да кӱлдымӧ пӧлекым налаш тыршыман огыл. Мутлан, икмыняр тӱжем теҥгеаш статуэтке, сӧрастарыш, йот эллашке путевко ты гана уто лийыт. Ӱшкыж тидым огеш акле.
Мом пӧлеклыман?
Пӧлек кӱлешан, тыгодым шулдаканрак лийшаш. Ош тӱсан гын, путырак келшен толеш. Мутлан, ош тӱсан фарфор ате-кӱмыжым але кухньышто кучылтшашлык ӱзгарым але арверым пӧлеклен кертыда. Тыгак Ӱшкыж шкеж гай форман кӱртньӧ гыч ыштыме копилкылан куана.
Л.КАМАЛЕТДИНОВА
