Марий Элын выпускникше-влак кокла гыч 60 процентше Иктешлыше кугыжаныш экзаменлан (ЕГЭ) профилян математикым ойырен.
Общеобразовательный организацийлаште кугыжаныш иктешлыше аттестаций нерген Марий Элым вуйлатыше Юрий Зайцевын эртарыме правительстве заседанийыште республикын образований да науко министрже Лариса Ревуцкая каласкален
Экзамен пунктлашке (чылаже 110 уло) электротул чарныде да правил дене келшышын толеш, чыла вере кӱртньӧдетектор уло.
2025 ийыште республикыштына кугыжаныш иктешлыше аттестацийым 9-ше да 11-ше класслам тунем пытарыше 11 тӱжем наре выпускник эрта, тидыже ӱмашсе деч 7 процентлан шукырак. Марий Элыште шинчымашым тергыме тургым федерал, регион да муниципальный кӱкшытлаште ончыкталтеш. Тидын шотышто 2023 да 2024 ийлам иктешлыме почеш республикна элнан 10 эн ончыл регионжо-влак радамыш пурталтын.
Республикыштына экзаменым эртарымашке 3,5 тӱжем утла еҥым ушымо. Нуно специализироватлыме тунемме платформышто шинчымашым налыныт, тренировко сынан мероприятийыште лийыныт. Предмет комиссийлаш вуз ден школла гыч 600 утла туныктышо ден преподавательым пуртымо. Экзаменлаште пашам ыштымылан нунылан республикын бюджетше гыч 12 миллион наре теҥге ойыралтын.
Математике да естественно-научный образованийын качествыжым саемдыме шотышто Россий Федераций правительствын пеҥгыдемдыме комплексный планын ик показательже почеш – 2030 ийлан 11-ше классым тунем пытарыше-влак кокла гыч профилян математике, физике, химий, биологий да информатике дене ЕГЭ-лан ойырышым 35 процент марте кугемдымаш. Тений тиде задачым шуктымо: выпускник-влак кокла гыч 38 процент утла экзаменлан профилян математикым да естественно-научный предметлам ойырен. Обществознаний предмет дене ЕГЭ-м республикыштына кажне кокымшо выпускник кучаш кумылым ончыктен, профилян математике дене – 60 процент, физике дене – 30 процент. Россий Федерацийын палемдыме предметлам ойырымо шотышто рейтингыштыже 2024 ийыште Марий Эл кок гана лидер лийын.
Марий Эл вуйлатышын пресс-службыж негызеш Галина Кожевникова ямдылен
Денис Речкинын фотожо
