РФ правительствын пунчалже почеш, «Российская организация высокой социальной эффективности – 2019» всероссийский конкурсыш йодмашым налаш тӱҥалыныт.
Тудо калыкын тӱткышыжым социальный йодышым организаций кӱкшытыштӧ решатлаш кӱлмылан ойырымашке, социальный задаче-влакым сайын решатлыше организаций-шамычын социальный проектыштым рашемдымашке, айдеме факторым – производствым вияҥдыше тӱҥ факторым – тӱҥалтыш (инициативе) да усталык дене вияҥдымашке виктаралтын.
Конкурс кок этап дене эрта: федеральный да региональный кӱкшытлаште. Тушто российысе чыла юридический лица ден нунын филиалышт надырым пыштыде участвоватлен кертыт.
Конкурс ешан пашазын паша условийжым саемдымашке, пашашке инвалидностян граждан-влакым налме, паша верым ыштыме да вияҥдыме, производствышто сусыргымым да профессий дене кылдалтше чер дене черланымым шагалемдыме, корпоративыште поро кумылым ончыктымо да таза илыш-йӱлам вияҥдыме дене кылдалтше 15 номинаций дене эрта.
Йодмашым Марий Элын Паша да калыклан паша верым ситарыме департаментыш ( 424000, Йошкар-Ола, Ленин проспект, 24-а пӧрт, 508-ше кабинет) 15 сентябрь йотке колтен шуктыман.
Конкурсын условийжым Департаментын интерактивный порталыштыже (marieltrud.ru) да 8 (8362) 42-99-17 номеран телефон дене рашемдаш йӧн уло.
М.ИВАНОВА
