УВЕР ЙОГЫН

Верховный суд Марий Элын ончычсо кугыжаныш пого министржылан штрафым кок пачаш шукырак тӱлыкташ палемден

Марий Элын Верховный судшо республикын ончычсо кугыжаныш пого министржылан палемдыме штрафым кок пачаш кугемден. 

Верховный судышто Наталья Хайруллова ден кок эргыже шотышто аппеляцийым онченыт.  

Тений апрельыште Йошкар-Оласе суд ончычсо министрым кугу взяткым налмыжлан титаклен да 6 ийлан эрык деч посна кодаш да 13 миллион теҥге штрафым тӱлыкташ приговорым луктын. Тыгак тудлан кугыжаныш кучем органлаште пашам ышташ 2 ий жаплан чареныт.

Наталья Хайруллован кок эргыже взяткым пуымо годым коклазе лиймыштлан титаклалтыт. Нуным 5 ийлан эрык деч посна коденыт.

Суд доказатлен: 2016 ий декабрьыште ончычсо министр ик чоҥышо коммерческий фирмын еҥже деч 13 миллион теҥге взяткым эргыже-влак гоч налын.

Марий Эл Республикын прокуратурыжо Йошкар-Оласе судын лукмо приговоржо дене келшен огыл. Верховный Суд тидым шотыш налын да штраф кугытым 26 миллион теҥге марте кугемдаш палемден, палдара республикысе прокуратурын пресс-службыжо.

Л.Камалетдинова.

Опубликовать в Одноклассники

Добавить комментарий