Кушто служитлаш тӱҥалыт?
Элыштына шошо призыв тӱҥалын. Тудо молгунамсе семынак 1 апрель гыч 15 июль марте шуйна.
–Ача-ава-влак ынышт тургыжлане манын, вигак палдарынем, призывник-шамычым Донецк, Луганск республикла, Запорожский, Херсонский областьлашке огыт колто. Тыгак специальный военный операцийлаште участвоватлаш огыт тӱҥал, – палемден Марий Элын военный комиссарже Кирилл Солодовник. – Тений регионнан тӱрлӧ кундемже гыч 1996-2005 ийлаште шочшо 800 наре самырык еҥ салтак радамыш ушна. Нуно Вооруженный Вийын тӱрлӧ войскаштыже служитлаш тӱҥалыт, но тӱҥ налмаште – сухопутный войскаште.
Эн ончыч кажне кумшо призывник «учебкыш» логалеш. Икмыняр тылзе жапыште техникым туныктат да военный специальностьым пуат.
Военкомын палемлымыж почеш, элитный войскаште служитлымаш (мутлан, ВДВ-ште, теҥыз флотышто, спецназыште) рекрутын тазалыкше, моральный да психологий качествыж дене кылдалтын. Тиде але вес войскашке келшен толмо шотышто иктешлымашым садак призывной комиссий ышта.
– Научно-шымлымаш але шонен лукмо пашан, вузышто ойыртемалтше призывникын научно-производственный подразделенийыш логалаш йӧнжӧ уло. Тыге нуно кугыжаныш обороно аланыште шымлызе, конструктор, инженер, специалист да эксперт-шамычын вуйлатымышт почеш научно-исследовательский пашаште тыршен кертыт, – рашемден К.Солодовник.
Идалык ончысо семынак кӱшыл образованиян, идалык наре IT-компанийыште пашам ыштыше самырык еҥлан отсрочко пуалтеш. Вузым тунем пытарыше да идалык деч шагалрак стажан специалистат отсрочкым налын кертеш.
Тений шошым армийыш кайыше-шамычлан улшо законодательстве почеш, чыла социальный гарантий аралалтеш. Ешан, йочан, черле але пенсийыште улшо ача-аван призывникым, йӧн лийме семын, шке кундемыште улшо воинский частьлашке колташ тыршат.
Палаш. «Крутой» мобильный телефонным мӧҥгеш кодыман, вет военнослужащийлан Интернетыш лекташ лийше, мультимедийный йӧнан мобильный телефон дене пайдаланаш чарыме.
Марий Эл гыч икымше командым 20 апрельыште колташ палемдыме.
Е.Эшкинина.
