УВЕР ЙОГЫН

Вашлиймаш дене паша пытен огыл, а тӱҥалын

28 июльышто Марий Эл вуйлатышын пашажым шуктышо Александр Евстифеев У Торъял районышто илыше-влак дене вашлие. Вашлиймаш верысе тӱвыра пӧртыштӧ эртыш. Тушко калык шыҥ-шыҥ погынен ыле.

Эн ончычак тудо республикын кызытсе социально-экономичекий сӱретше дене кӱчыкынрак палдарыш, вара еҥ-влакын йодышыштлан вашешташ тӱҥале. Но шкетын огыл. Тарватыме теме шот дене ты вашлиймашыш мийыше икмыняр министр ден министрын пашажым шуктышо-влак вашештышт.

Икымше йодышым тунемше пуыш. Тудо У Торъял поселкышто физкультурно-оздоровительный комплексым кунам почыт манын йодо.

— Тыгай объект-влакым 2011 ийыште популизмлан, сайлымашлан кӧра чоҥаш тӱҥалыныт. Но ФОК-ым чоҥен шындыме денат паша огеш пыте. Тушто тренер-влак пашам огыт ыште гын, «колышо» гай шогышо полат лиеш. Адакшым тыгай зданийым обслуживатлыман. А тидлан шагал огыл окса кӱлеш. Но нӧлташ тӱҥалме годым тидын нерген шонен огытыл, очыни.

Александр Евстифеев тиде йодышлан спорт министрын пашажым шуктышо Иван Гребневланат вашешташ темлыш.

— Республикыштына чоҥаш тӱҥалме шым ФОК-ым нӧлтен пытараш окса  кум ий огеш ойыралт. Кокыт шотышто, тышке У Торъял поселкысо ФОК-ат пура, контрактым 2017 ий мучаш марте шуйымо. Ончыкыжым оралтым угыч проектироватлат. Тиде акшым шулдештараш полшышаш. Тиде комплексым чоҥен шуктымо дене кылдалтше йодыш рашемдалт шуэш, шонена, — мане Иван Вячеславович.

Верысе «Водоканал» предприятийын директоржо эрыктыше сооружений-влак дене кылдалтше йодышым пуыш. Тудын чот тоштемше да палемдыме йодмашлан келшен толдымо улмыжлан кӧра чӱчкыдынак штрафым тӱлыктымӧ нерген ойлыш да ты шотышто иктаж-могай вашталтышым пурташ йодо, ремонтым ышташ кӱлмӧ нергенат палемдыш.

— Вашлиймаш пытымеке, чоҥымо паша да жилишно-коммунал озанлык министрын алмаштышыже тендан дене пырля кая да те тудлан чылажымат верыштак ончыктеда,каласкаледа, — туран каласен, кӱштымашым пуыш  Александр Александрович. – Весе. Чарныде штрафым тӱлыктымаш мыйымат шыдештара. Штрафым тӱлыктымӧ, вуйлатышым кораҥдыме дене паша огеш воране. Тыгай койышым пытарыман.

Вашлиймаште тарватыме вес пӱсӧ йодыш У Торъял – Масканур корнын 13-шо километрыштыже верланыше кӱвар дене кылдалтын ыле. Ялын старостыжын ойлымыж почеш, тудо 2006 ий гычак аварийныйлан шотлалтеш. Но ик ведомствынат балансыштыже улдымыжлан, а тыге гын, озаже укелан кӧра тӧрлатышашлан нимо огеш ышталт. Туткар лийме деч шекланен, тунемше-влакым автобус дене поселкысо школыш наҥгайыме годым, волтен, кӱвар гоч йолын ошкыл эрташ темлат. Тидым шотыш налын, республик вуйлатышын пашажым жаплан шуктышо деч кӱварым тӧрлаташ оксам ойыраш полшаш йодыч. Тудын акше 130 миллион теҥгешке шуэш. Йодышым рашемдышашлан А.Евстифеев республикын промышленность да транспорт министрын пашажым жаплан шуктышыланат вашлиймаш деч вара вигак ты верыш миен толаш да улшо сӱрет, мом кузе ышташ лийме шотышто ончыкыжым правительствын заседанийыштыже палдараш темлыш. (Кӱштымым Д.Волков шуктыш – вашлиймаш деч вара староста дене кӱварым пырля ончен савырнышт – авт.) Тыгак Александр Александрович верысе кучем вуйлатыше-влаклан тиде йодыш дене пашам ышташ да очистной сооружений ден кӱварым тӧрлатышашлан кӱлеш наре оксам ойыраш 2018 ийлан Марий Элын бюджетышкыже пуртышашлан документ-влакым ямдылаш кӱштыш.

— Кажне йодышымак тыманмеш рашемдаш огеш лий. Шукыжо ий дене погыненыт. Но калыклан илаш йӧным ыштыме дене кылдалтше йодыш-влак писын рашемдалтшаш улыт, — мане регион вуйлатышын пашажым шуктышо. 

Кок шагат наре шуйнышо вашлиймаште еҥ-влак тудлан чылаже 16 йодышым пуэн шуктышт. У Торъял районышто илыше калыкым корным тӧрлатыме, яллашке газым пуртымо, «Илыме вер» программыш ушнымо, «Ветеран труда» званийым налме, образований, здравоохранений, изи бизнеслан полшымо да икмыняр моло йодыш тургыжландарыме палдырныш.  

Вашлиймаш деч ончыч да вара тӱвыра пӧртын фойештыже регион вуйлатышын общественный приемныйжо пашам ыштен. Тушко 20 утла еҥ йодышым пуэн. Нунылан кажныжлан палемдыме жапыште вашештат.

Вашлиймаш пытымеке, иктешлымашым ыштыме семын Александр Евстифеев тыге палемдыш:

— У Торъял районышто илыше-влак чолга улмыштым ончыктышт. Нуно йодышым пуышт веле огыл, эше мом кузе ышташ лийме шотышто темлымашыштым ойлышт. Ме чыла йодышлан вашештена: мый денем пырля толшо-влак чыланат районышто пашам шуят, тургыжланымашым лукшо верлашке миен толыт, профессионал семын аклен ончалыт да мылам каласат. Кажне йодышым рашемдышашлан ме йӧным кычалаш тӱҥалына.

Любовь Камалетдинова.

Опубликовать в Одноклассники

Добавить комментарий