«ТНТ» канал дене «Битва экстрасенсов» передачым шукынжо кугу кумыл дене ончат. Тушко вийыштым, мастарлыкыштым да моштымашыштым ончыкташ еҥ-влак кушеч гына огыт мий?! А вес таҥасымаште Йошкар-Ола гычат еҥ лийын кертеш. Але марте икмынярын тушко логалаш тыршеныт, но конкурс гоч эртен кертын огытыл.
Тиде – Алена лӱман ӱдыр. Тудо «Битва экстрасенсов» таҥасымашыш логалаш икымше этапым эртен да кокымшыш ӱжыныт. Кастинг 18 мартыште Чебоксар олаште лийын.
Каласкалымыж почеш, тушто Аленам моткоч порын вашлийыныт, чай ден кофем йӱктеныт, вара анкетым возаш темленыт. Туштыжо шкем «ведьмалан» але «экстрасенслан» шотлымым палемдаш кӱлын. Но ӱдыр раш вашмутым пуэн огыл. Шкенжын ойлымыж почеш, тудо поро, сандене «ведьма» лийын огеш керт.
Конкурсыш ушнаш шонышо-влаклан тӱрлӧ заданийым шукташ кӱлын. Икымшыште, мутлан, чарша шеҥгелне мо улмым каласаш йодыныт. Алена тушто ала-мо йыргешке, кочкаш йӧршыла койшо, но шинча дене ала-могай кыл улмо нерген каласен. Ширме шеҥгелне шинчаолман (глазное яблоко) макетше лийын. Кокымшо заданийыште ик ӱдырын фотожым пуэныт. Алена тудын койыш-шоктышыж, пашаже, пӱрымашыже, илыше але колышо улмыж нерген ойлен. Вашмутшо чылаштлан келшен. Кумшо этапыште воктекше конден шогалтыме еҥ нерген каласкалаш йодыныт. Жюрилан тиде заданийым кузе шуктымыжат келшен. Очыни, санденак съемко деч вара Марий Эл гыч шинчанужшо деке еҥ-влак тӱрлӧ йодышышт дене лишемыныт, южышт визиткыжымат налын коденыт.
Ынде Алена Москвашке ӱжмашым вуча. Меат «Битва экстрасенсов» передачыш логалеш манын вучаш тӱҥалына.
Л.Камалетдинова.
