Марий Эл Республикын Звенигово районысо Военный комиссариатшын пӧлкаштыже военно-патриотический вашлиймаш – Призывникын кечыже – эртен.
Мероприятийыш 9-11 класслаште да Транспорт-энергетике техникумышто тунемше рвезе-влак миеныт. Нунын дене военкоматын пашаеҥже-влак мутланеныт, тыгодым кажныже палемден: армийыште служитлаш да шочмо элым аралаш – Россий Федераций гражданинын порысшо да обязанностьшо. Кажне призывникын тӱҥ задачыже – армийыште шот дене служитлен, ешартыш военный специальностьым налын, мӧҥгышкӧ таза пӧртылаш. Служитлыме ик ий писын эртен кая, но тудо ӱмырешлан ушеш кодеш. Армийыште рвезе-влак илышын сай школжым эртыме деч посна эше чын йолташ-шамычым муыт, капкыл денат, чон денат пеҥгыдемыт… Тылеч посна служитлыше граждан-влаклан кугыжаныш велым гарантироватлыме сай ончыкылык почылтеш.
Тиде вашлиймаш оҥайын да пайдалын эртен. Шуко рвезе армий шотышто шонымашыжым сай велыш вашталтен.
М.ИВАНОВА.
