ЛОТЕРЕЙ Ял илыш

Ӱмыр мучко — «Марий Эл» газет дене пырля!

«Марий Эл» газетнам подписке почеш налын шогышо-влак коклаште кажне пел ийын лотерейым эртарена. Призым модын налше-влак южышт шкеак редакцийыш толын налын каят, а кудыжлан корнына возеш гын, ме намиен пуэна.
Теве август мучаште Шернур район Чисола ялыште лиймем годым ик эн кугу признам — «Амарис» фирмыште мебельым налаш 5 тӱжемлан сертификатым — пошкудо Роза акалан, Роза Ивановна Чендемеровалан, кучыктышым. Йыҥгыртымем годым корем тайылыште кокымшо кос шудым солен пытарыме деч вара кӱза улмаш. «Пӧлекетым конденам, марий тувырет чиен лек» маньымат, «Ой, чечас, вучалте, мый писын. Газетышкак луктат мо?» пуштыланенрак йодо. Шкеже окнаш ончаш пижым — лекмыжым эскерем. Лектынат ыжым шукто — йыҥгырта, «Ямде улам» шокта.
Роза ака Качын почиҥгаште шочын-кушкын. Пелашыже Иван Григорьевич дене кок икшывым ончен куштеныт. Марий ялозанлык техникум деч вара ӱмыржӧ мучко «Кукнурский» совхозышто, варажым «Кукнур кундем» язозанлык предприятийыште бухгалтер-плановиклан, эсогыл сулен налме канышыш лекмекшат эше вич ий ыштен. Пашан ветеранже шке жапыштыже Россий Федерацийысе Ялозанлык министерствын Чап грамотшо, тыгак республикысе Ялозанлык да продовольствий министерствын Чап грамотшо дене палемдалтын. Иван Григорьевич Чендемероват, кундемыште тудым Криш Йыван маныт ыле, эреак совхозышто тыршен, ик гана огыл комбайн дене шиймаште икымше верыш лектын, тале гармонист лийын. Передовой улмыжлан республик кӱкшыт дене Йошкар-Олаште тудлан эсогыл «Урал» мотоциклым пӧлекленыт.

Вачӱмбакыже 76 ийым пыштыше пошкудем мо шарна, изиж годсекак ешыштышт эреак «Марий коммуна» («Марий Эл») газетым  «Ончыко» ден «Пачемыш» журналым налыныт.  Кызыт Роза Ивановна, суртышто шкетын шогылтеш, эрге ден ӱдыржӧ ешышт дене толын полшен кодат, пошкудо-влак дене келшен илат.  «Марий Эл» ден «Сурт-печым» куанен лудеш, подпискым ыштыме квитанцийжым шуко гана редакцийышкына лотерейлан колтен. Тиде — кокымшо гана налме приз. «Редакций пашаеҥ-влаклан, фирмылан моткоч кугу тау пӧлеклан.  Шукертак муро дискым модын налынам ыле. Ынде теве  — мебельлан сертификат. Ӱдыремлан пуэм, тек шонымыж семын кучылтеш» — чонжым почо Роза ака.
Почешмут. Южыжо, очыни, шоналта: шке пошкудыжлан призым луктын пуэн. Чу, йоҥылыш лийыда. 300 утла серыш кокла гыч тудыным мый огыл, весе луктын, вияш эфирыште. Мо оҥайже, тиде  гана Шернур район гыч 13 еҥ призым  модын налын. Молан тыге шонеда? Шернур кундемыште «Марий Эл» газетым ик эн шукын лудыт. Морко районыштат лудшына-влак шукын улыт. Сандене призшат нине кундемлаш утларак каен.
Светлана Пехметова
Авторын фотожо
Опубликовать в Одноклассники

Добавить комментарий