«Марий Эл» газетлан возалтмеке да лотерейыш ушнаш квитанцийым колтымеке, очыни, кажныже мо гынат модылтеш манын ӱшанен вуча.
У Торъял районысо моткочак моторын йоҥгалтше Пеледыш лӱман ял гыч Лариса Ельмекееван ӱшанен вучымыжо арам лийын огыл – тудо пиалан-влак радамыш логалын!
– Лариса Владимировна, «Марий Эл» газетым те кунамсек налыда?
– Ачам-аваммыт изиэм годымак тудым налыт ыле да ты пагыт годсек мый эре лудам. Нуно коктынат туныктышо лийынытат, ятыр газет ден журналлан подпискым ыштат ыле. Ешна тӱҥалтыште Тошто Торъялыште илен. Ачам, Владимир Гаврилович Пушкин, верысе школ директорланат ыштен. Авам, Роза Ивановна Пушкина, тӱҥалтыш класслам туныктен. А вара Кузнечыш илаш кусненыт. Туштат коктынат школышто тыршеныт. Нуным онченак, мыят лудаш шӱмаҥынам. А марлан лекмеке, мыят шке ешлан налаш тӱҥальым.
– Газетнам тынар кужу жап лудыда гын, мо у пурталтмым, могай вашталтыш лиймым ужыда, шекланеда. Тендан шонымаште, кызыт мыланна мом ешараш кӱлеш?
– Те такшым вашталтышыжым эреак пуртеда. Кажне ийын могай-гынат вашталтыш уло. Сандене кызытсе газетыште чыла келша. Мый икымше лаштык гыч тӱҥалам да пытартыш марте чыла лудын лектам. Но, яллашке миен толмекыда, весе-влакын кузе илымышт, пашам ыштымышт нерген возымыдам лудаш утларак йӧратем. Газетым эре уло еш дене лудынна. Кызытат пелашем, мый, изи ӱдырна шергал лектына. Ачам-авам семынак ынде меат икмыняр газетым налына да черет дене лудына.
– А лотерейыште пӧлекым модын налмыда нерген шкеак эн ончыч ужында але иктаж-кӧ каласен?
– Шкеак ужынам.
– Тиде икымше сеҥымаш лийын?
– Кокымшо. Икымше гана иктаж вич-куд ий ончыч пӧлекым модын налынам. Тунам «Иван-чай» набор ден носки логалыныт. Призлан редакцийышкыда шкеак миенам ыле.
Подпискым ыштымеке, квитанцийжым мый кажне гана ятыр ий колтенам. Но конверт дене огыл, а электрон почтыш. Тыге ик ганат приз модылтын огыл. А тиде гана серыш семын колтышым да сеҥыше-влак радамыш логалынам!
Тылеч ончыч эше ик газетыш квитанцийым колтенам да тушто аптекыш 500 теҥгеаш сертификат логалын ыле. Но тунам йочана изирак лийын да налдеак кодын.
– Квитанцийым колтымеке, лотерейым кунам эртарат, кӧн мом модын налмыжым кунам возат манын, вученда?
– Вучымо, газетыште эреак ончымо. Сеҥен налше-шамыч коклашке логалынам але уке манын, пален налаш оҥайыс. Ала тӱҥ приз логалеш манын вучет.
– Ты гана январьысе ик газетым ончалда да кеч изирак гынат, но садак пӧлек логалмым, пиалан-влак радамыште улмыдам ужда…
– Туге. Ужмеке, ешыште куанен ойлышым: «О-о, мылам «Марий Эл» газетын фирменный блокнотшо ден ручкаже логалыныт!» Кугурак ӱдырна-шамыч дене телефон дене мутланыме годымат, а нуно тӱрлӧ вере илат, призым модын налмем нерген каласышым. «Молодец!» маньыч. Вет подписчикдаже шукын улыт да пӧлекше кажныланжак огеш логал! А эше квитанцийжым чылт чыланжак огыт колто докан. Сандене пӧлеклан моткоч куанет! Мый гын кажне гана пелийлан подпискым льготный декаде увертаралтме годым ышташ тыршем.
Мыламже ты гана лач бухгалтерланак келшен толшо приз логалын. Но тудым эше кучылташ тӱҥалын омыл. Кузе пашашкем намиен пуэнда, туштак кия. А ончыкыжым тушко иктаж-мом ойыртемалтшым возаш тӱҥалам. Лачшымак мом – эше шонен омыл. Тӱҥжӧ – тудо кӱлешан, пайдале лийже да шарнымашеш кодшо. Рецепт-влакым возаш тӱҥалам, докан.
– Тугеже умбакыжат газетлан возалташ да лотерейыш ушнаш тӱҥалыда?
– Ой, конешне! Ынде тӱҥ призыш «кайыман» (воштылеш – авт.). Пиал шыргыжалже ыле!
– Тугак лийже!
– Тау!
Чынак, тек тыгак лиеш: газетнам кужун налшыланак тӱҥ приз логалже! Ятыр ий «Марий Эл» дене поро йолташ лиймыжлан тауштымо семын…
Любовь Камалетдинова мутланен.
Авторын фотожо
