Ленинград областьысе Кировск олаште калык кокласе кыл шотышто советын заседанийже эртен. Тудым областьысе губернатор Александр Дрозденко вуден. Тушто ты областьысе «Ший корно» марий калыкле-тӱвыра автономийын председательже Евдокия Соловьеват участвоватлен.
Тӱҥ мерприятийже Кугу Отечественный сарыште сеҥымылан 75 ий теммылан пӧлеклалтын да «Прорыв блокады Ленинграда» тоштерыште эртен. Евдокия Евдокимовна калык кокласе кыл шотышто советын еҥже семын автономийын ты кугу датылан пӧлеклалтше мероприятий-влакым эртарыме дене палдарен. Поснак «Мы вместе защищали Ленинград» шарнымаш книгам лукмо паша нерген каласкален. Савыктыш автономийын тӱҥалтышыжлан кӧра ош тӱням ужын. Книгашке Кугу Отечественный сар жапыште Марий кундем гыч Ленинград мландыште кредалше да вуйым пыштыше-влак нерген материалым чумырымо. Эшежым нунын лӱмеш Пискарев шӱгарлаште шарнымаш плитам вераҥдыме. Тидым илышыш пурташ Марий Эл правительстват полшен. А книгажым савыкташ субсидийым Ленинград областьысе бюджет книгоизданий сферыште социально-кӱлешан проект почеш ойырен.
Л.Соловьева губернаторлан ты книгам кучыктен да Пискарёв шӱгарлаште шарнымаш плитам почмашке мияш ӱжын. Ты событийже 12 сентябрьлан эртараш палемдалтын. Тушко Марий Эл гычат делегаций кайышаш. Тудым Марий Эл Председательын икымше алмаштышыже Михаил Васютин вуйлаташ тӱҥалеш.
Палемден кодыман, «Ший корно» НКА Ленинград областьыште сайын палыме. А тенийлан илышыш шындараш палемдыме «Интерактивные национальные музеи — объекты межнационального согласия и патриотического нравственного воспитания (на примере интерактивного марийского музея «Мари тоштер»)» проектышт эсогыл Россий Президентын грантшым сеҥен налын ыле.
С.НОСОВА
