УВЕР ЙОГЫН

Волонтёр-влаклан кок машинам ойырымо

Марий Элын правительствыже у коронавирус инфекций шарлыме жапыште граждан-влаклан полшышо Волонтёр рӱдерлан кече еда кок машинам ойыра.
Таче регионыштына 200 утла волонтёр тӱҥ шотышо шоҥгыеҥ ден инвалид-шамычлан продуктым, медикаментым да кӱлешан моло сатум кондыштара. Сутка мучко рӱдерыш граждан-влак деч шуко йодмаш пура. Машинам волонтёр-влак полышым йодшо кажне еҥ деке миен шуышт манын ойырымо.
«Эрдене диспетчер могай машина ден водительым колтымо нерген йыҥгыртен увертара. Поликлинике гыч рецептым, аптекыште эмым мойн налаш кӱлмӧ шотышто йодмаш уло гын, волонтёр тиде сомылым шукташ машина дене кудалеш. Паша кечыгутлан сита», — манеш Самырык-влакын полатыштым вуйлатышын алмаштышыже Лариса Лоскутова.
Ушештарена, коронавирусын пандемийже дене кылдалтше утларак ямде улмо режимыште Марий Элысе калыклан полшымо шотышто волонтёр рӱдерын телефонжо: 8 (8362) 63-00-39.

М.ИВАНОВА

Опубликовать в Одноклассники

Добавить комментарий