УВЕР ЙОГЫН

Чумыр Юлсер кундемым тарватен

Авам кок арнялан «петыреныт»
Кечын шарлыше у коронавирус инфекций тӱнямбалсе чыла гаяк элым азапыш пуртен. COVID-2019 Марий Элысе Юлсер кундемымат ӧрдыжеш коден огыл. Поснак Волжск оласе рӱдӧ больницын первичный вӱргорно отделенийжын пашаеҥже-влак йӧндымӧ илыш йыжыҥыш логалыныт. Тушко Провой кундем гыч ик пациентым эмлаш пыштеныт, но кардиологий профиль дене медицине полышым пуымо годым врач-влак тудын коронавирус дене авалталтмыжым рашемденыт. Черлым Звенигово районысо рӱдӧ больницын коронавирус инфекциян пациент-шамычым эмлыме отделенийышкыже кусареныт, а Волжск оласе рӱдӧ больницын первичный вӱргорно отделенийжым тичмашнек кок арнялан карантиныш петыреныт. Тыге ик врач, кум медсестра, ик санитарке да 13 пациент отделений гыч лектын кертдыме лийыныт. Йӧра, кугыеҥ-влак латныл кечым кузе-гынат чытат… Но эрдене пашаш кайыше ава-шамычым йоча-влак чытыдымын вучат! Нунын кокла гыч эн изижлан – эше кок ий веле.
Чаманыме шагал…
– Ик кечын палыме ӱдыр йыҥгыртыш да пеш шучко историй дене палдарыш: селаштышт карантиныште улшо медикын ешыж шотышто Ватсап мессенджерыште увер коштеш, пуйто «нине еҥ коронавирус инфекциян улыт, сандене шкешт дене мутланаш веле огыл, эсогыл подъездышкышт пураш лӱдыкшӧ…» А мый палем, тиде медпашаеҥ шӱм черан пациентын коронавирусан улмыжым рашемдыме годым сменыште лийын да тылеч вара мӧҥгыжӧ пӧртылын огыл! – Волжский районысо рӱдӧ больницын первичный вӱргорно отделенийыштыже тыршыше-влакын да нунын ешыштын могай азапыш логалмышт дене палдарыш Приволжский посёлкышто илыше Денис Смирнов, ОНФ-ын Юлсер кундемысе волонтёржо. – Пациентын илышыж верч йӱдшӧ-кечыже кучедалше медик-влакын йочаштым, пелашыштым тугай чот чаманышым… Да тунамак вӱргорно отделенийын пашаеҥже-шамычлан, нунын ешыштлан полшаш шонен пыштышым. Икшыве-влак ынде шукертак самоизоляцийыште улыт: школышкат, йочасадышкат огыт кошт. Авашт ынде кокымшо арня уке… Тыге Ватсапысе «Шнуй кугун орланыше Димитрий Солунскийын черкыже. Шарача села» группыш карантиныште улшо медик-влакым куандарыме, нунын ешыштлан полшымо шот дене оксам погаш темлышым. Кӱчык жапыште 25 тӱжем теҥге наре чумыргыш. Шуко еҥ вигак кугу суммым колтен, нунын коклаште медикын ешыж шотышто шучко да шояк уверым шаркалыше-влакат лийыныт – шонымашыштым вашталтеныт, коеш. Поро пашашке Шарача кундемысе калык дене пырля черкын настоятельже протоиерей Евгению Бакутов, Пӧтъял школын туныктышыжо-влак, Памар селасе «Каприз» кевыт, йолташем Денис Земляницкий уло кумылын ушненыт: кӧ окса, кӧ сату дене полшеныт.
Эсогыл пельменьым нальын!
Верысе педиатрын, поро кумылан еҥ-шамычын темлымышт почеш, тыгак ача-шамычын кочкаш ямдылыме пашаштым куштылемдаш манын, кок Денис йоча-влаклан тӱрлӧ сатум – писынрак шолташ лийме пучымышым, тутло торыкым, йогуртым, сокым, мандариным, олмам, печеньым, вафльым, чайым, нугыдемдыме шӧрым, муным, эсогыл куличым, жапым веселан эртарашышт альбомым, чиям, кистычкым, фломастерым, пазлым, раскраскым, ӱдыр-влаклан курчакым, рвезе-шамычлан конструкторым да шуко молым наледеныт. Эмлымверысе кочкышын пеш писын шерым темымыжым умылен, отделенийыште плиташт улмым рашемдымек, медик-влаклан эше пельменьым, котлетым, салатым ышташышт киярым, помидорым, ӱмбалым да мойн ешареныт. Пациент-шамыч нергенат монден огытыл. Мут толмашеш, отделенийыште Морко да Звенигово районла гыч кок черле эмлалтеш. Нунын деке шукертак нигӧ толын огыл, сандене волонтёр-шамычын йокмаштым «лишыл еҥыштын мӧҥгӧ гыч кондымо костенечышт» семын акленыт.
Юмылан тыге кӱлеш улмаш
– Мый эше Марий епархийыште ыштем. Илыш корныштышт чыла сай лийже манын, вӱргорно отделенийын кажне пашаеҥжылан «Аралыше сукчо» лӱман куд изи юмоҥам нална. Иктыжым шканем кодем, шонышым, но монденам… А вара рашеме: медик-шамыч кудымшо юмоҥам вес верам кучышо санитаркылан темленыт, да ӱдырамаш тудым уло кумылын налын. Мыйын шонымаште, Юмо лӱмынак тыге ыштен: мыланем мондаш, тудлан пӧлеклаш. Тиде кечын Господьын Иерусалимыш пурымо пайремже ыле. Ынде шонем, Юмо тиде ӱдырамашын илыш корныжым православный вераш савыра гын веле?.. – ӧрын-куанен каласкалыш Денис Вячеславович.

Вич вер, но икумыл
Пел кече наре наледен коштмо сатум кок йолташ ончыч Волжск оласе рӱдӧ больницыш намиен. Тушто нуным карантиныште улшо-шамычлан кочкышым кондыштарыше санитарке вашлийын. Тудак йокмам медпашаеҥ ден пациент-влаклан пуртен.
Тылеч вара волонтёр-влак Упшерыш кудалыныт. Тиде ялыште ик медсестран ешыже – кум йочаже да пелашыже – ила. Вара Приволжский посёлкыш пуреныт. Тыште – вес медсестран индеш еҥан ешыже карантиныште: ӱдырамаш смене деч вара мӧҥгыжӧ толын, коронавирусан черлым эмлымыже вес кечын веле рашемын. Ончыч черле, а вара еш дене кыл лиймылан кӧра чылаштым карантиныш шынденыт. Кумшо точко – Кукшэҥер ял. Тыште ача кум йочам ынде кокымшо арня шкетын онча, эн изижлан – улыжат кок ий.
– Пелаш деч посна неле, очыни, манын йодмемлан пӧръеҥ-шамыч вуйыштым шып савалтышт. Конешне, куштылго огыл… Вет пашашкат коштман, кочкашат шолтыман, икшыве-шамыч дене урокымат ыштыман, сурт сомылкамат ворандарыман… Ик ача вигакше вашештенат ыш керт: логарышкыже комыля кӱзыш, шинча йырже вӱд нале… – Денисын шкенжынат йӱкшӧ чытырналте. – Нунын дене изиш веле мутланыме гыч умылет: содыки ӱдырамашын мӧҥгыштӧ улмыжо моткоч кӱлешан да шергакан! Тудо кече еда мыняр пашам ышта! А кызыт чыла тиде сомыл – пӧръеҥ вачӱмбалне. Нунылан, поснак кум йочан ача-шамычлан, кызыт поснак неле. Сандене, пӧръеҥ-влак, айста шке аванам, пелашнам, ака-шӱжарнам аклаш тӱҥалына.
Волонтёр-влак Шарачаште илыше ешышкат миен шуыныт, кок йоча ден нунын ачаштым мыняре йокма дене огыл, кунаре поро кумылышт, ончыкылык илышлан ӱшаным пуымышт дене куандареныт. Тыгак сай еҥ-шамычын шукырак улмыштым эше ик гана пеҥгыдемденыт.
Ӱдырамашлан нигунам куштылго лийын огыл
Кызытсе илыш сӱрет мыняр-гынат Кугу Отечественный сар жапым ушештара. Но тунам фронтыш пӧръеҥ-влак каеныт, да чыла неле паша тылыште кодшо ӱдырамаш-шамычын вачӱмбакышт возын. Кызыт – мӧҥгешла, вет медициныште утларакше ӱдырамаш-влак тыршат…
Медик-шамычланат пелаш ден йоча-влакым ужде илаш йӧсӧ.
– Теҥгече нунын кумшо результатышт Москва гыч толын. Юмылан тау, чыла сай, у коронавирус инфекций дене ик медпашаеҥат черланен огыл. Таче нуным карантин гыч луктыт… Ешышт дене кузе вашлийыт – шинчавӱд деч посна шоналташат, каласашат огеш лий, шонем, – манеш Д.Смирнов.
Шуко мунло еҥын ойлымыж почеш, кызыт тӱнямбалсе чумыр айдеме тукым пеш кугу тергымашым эрта. Мо дене тиде мучашлалтеш – Юмо гына пала, но ала-можо мемнан денат кылдалтын, очыни… А мый шке вечынем иктым каласынем: Денис Смирнов гай поро шӱм-чонан-влак шукынрак лийыт гын, айдеме тукым нигунамат ок пыте.
 

М.ИВАНОВА

Д.Смирновын фотожо

 
 
 
 
 

 

 

Опубликовать в Одноклассники

Добавить комментарий