Пытартыш жапыште республик мучко ятыр вере у фельдшер-акушер пунктым почыныт. Шернур район Зашижемье кундемыште илыше-влакат тудым вучен шуктеныт. Тушто медшӱжарлан Марий Пыжай ялыште шочын-кушшо, а кызыт Зашижемье селаште илыше Наталья Купсольцева тырша.
Ошалге тӱсан чатката оралте шинчалан вигак перна. Тудо селаш пурымаште, ял шотан илем администраций деч тораште огыл, верланен.
2014 ийыште Йошкар-Оласе медицине колледжым тунем лекмеке, самырык специалист Шернур эмлымверыште процедур кабинетыште пашам ыштен, а вара Зашижемье качылан марлан лектын. Тиде амал денак тудым селасе фельдешер да акушер пунктыш пашаш колтеныт. Самырык специалист ӧрын-лӱдын шоген огыл, чон йодмо пашалан кумылын пижын.
Ты медицине учреждений верысе ял шотан администрацийыш пурышо вич ялыште: Зашижемьеште, Кугу Шопкерыште, Изи Шопкерыште, Шӱдымарийыште, Кукмарийыште – илыше 524 еҥым обслуживатла. Нунын кокла гыч (18 ияш марте) – 104 йоча….
(Умбакыже материалым «Марий Эл» газетыште лудаш темлена.
А.БАЙКОВА
Авторын фотожо
