26 июньышто Марий Эл Республикым вуйлатыше Александр Евстифеев Росавтодорышто Федеральный корно агентствым вуйлатыше-влак дене республикын корно озанлыкшым вияҥдыме пеш кӱлешан йодыш-влакым каҥашен.
Тушто ик тӱҥ темыш 363,4 км кужытан Нижний Новгород – Боковая – Воскресенское – Копорулиха – Озерки – Йошкар-Ола регион-влак кокласе автомобиль корным («Приветлужье» корно) федеральный собственностьыш пуымо йодыш савырнен. Тиде корным федеральный собственностьыш 2024 ийыште пуаш палемдыме. Марий Элым вуйлатыше тиде пашам 2020 ийыш кусараш йодмаш дене лектын.
«Приветлужье» маршрутыш пурышо автомобиль корнылам федеральный собственностьыш пуымаш Российын рӱдӧ кундемлаж гыч республикыш толын коштшо турист-влакым палынак шукемдаш йӧным пуа. Тидын негызеш транспортный инфраструктурын объектше-влакым вияҥдаш, инвестицийым ушаш да чыла кӱкшытан бюджетыш налог да моло окса пурымым шукемдаш ешартыш йӧн лектеш.
Федеральный агентстве автокорнын статусшым вашталтыме жапым 2024 ий гыч 2020 ийыш кусарыме дене келшаш ямде. Тудо ик условийым гына шында: Марий Эл ден Нижегородский область ты йодышым тєрлышашлан вийыштым иктыш ушышаш улыт.
Росавтодорышто эртыше вашлиймаште тыгак Йошкар-Олаште Киров ден Строитель уремлам ушен шогышо корным ыштыме нерген мутланеныт. Тений тиде пашалан Марий Элын бюджетышкыже 100 миллион теҥгем да автомобиль корнылам шотыш кондаш эше 310 миллион теҥгем колташ палемдалтеш, каласен Росавтодорын региональный вияҥмаш да национальный проектым шуктымо шотышто управленийжын начальникшын пашажым шуктышо Алексей Торощин.
Вашлиймаште эше ик йодышым ончымо. Тиде – Йошкар-Ола – Зеленодольск автомобиль корным уэмдымаш. 2011-2013 ийлаште тиде корным 20 км кужытышто пужен уэмдыме. Тиде пашам умбакыже шуйымо шот дене Силикатный посёлко тураште эше 7 километр кужытым уэмдаш проектым ямдылыме.
Кызытеш тиде проект 2024 ий марте жаплан магистральный инфраструктурым уэмдыме да кумдаҥдыме комплексный планыш пурталтын огыл, но Росавтодорышто Марий Эл Правительствын темлымыжым поддержатлаш да тудым шуктымо дене кылдалтше йодышым умбакыже шымлаш ямде улмыштым ончыктеныт.
Марий Элым вуйлатыше Александр Евстифеев пырля пашам ыштымылан да поро кумылын мутланымылан Росавтодорым вуйлатыше-влаклан таум каласен.
Марий Элым вуйлатышын организаций да аналитике виктемжын уверже негызеш П.Шакиров ямдылен
