Йошкар-Оласе йочасадлаште балансироватлыме да чыла нормылан келшен толшо кочкышым ямдылат.
Общероссийский калык фронтын Марий Элысе пӧлкажын чолга еҥже ден Роспотребнадзорын Марий Элысе виктемжын специалистше-влак Йошкар-Оласе йочасадлаште кочкышым ямдылыме блок ден лишыл кок арняш менюм тергеныт.
ОНФ-ын регионысо исполкомыштыжо школ деч ончычсо тӧнежлаште йоча-влакым пукшымо йодыш шотышто «шокшо линийым» почмо ыле. Тушко кок арня жапыште 17 обращений пурен.
«Ача-ава-шамыч тӱҥ шотышто менюлан, пакчасаскам утыждене пуртымылан, емыж-саскам кораҥдымылан, тыгак шӧр кочкышым шагалемдымылан вуйым шийыныт», – палемда ОНФ-ын регионысо «Образование и культура как основы национальной идентичности» пашаче группым вуйлатыше Татьяна Глушкова.
Роспотребнадзорын Марий Элысе виктемжым вуйлатыше Светлана Булатован мутшо почеш, регионысо чыла йочасадыште икшыве-шамычын кочкышыштым балансироватлыме да чыла нормылан келыштарыме. А емыж-саскам энтеровирусан чер шарлымылан кӧра икмыняр жаплан кораҥдыме.
Эксперт-влак школышто пукшымо сӱретымат рашемденыт: шокшо кочкышым кочшо тунемше шагалемын толеш, тидыже поснак кугурак класслаште шинчымашым погышо-влак коклаште палдырна. 2015 ийыште шокшо кочкышым 89,7 процент тунемше кочкын гын, тений тиде цифр 85 процент марте волен. Амалжымат палемдыме: йоча-влак балансироватлыме кочкышым кочкаш кумылан огытыл. Специалист-влакын шонымышт почеш, таче шуко ешыште кочмо культурым формироватлыме огыл, тидыжак йочалан шокшо кочкыш деч шӧрлаш, тудын олмеш буфетыште кӱэштме изделийым налаш амалым ышта. Тиде йодышым школ кочмыверыште менюм уэмдыме да пойдарыме , кочкышым тамлештарыме дене решатлаш темлыме.
М.ИВАНОВА.
