Марий калык погын вашеш

Мут — делегатлан

Мут — делегатлан

Татьяна Рябова, Алтай кундем, «Алтай мари» калыкле-тӱвыра автономий вуйлатыше:

— Моткоч кугу тау йыҥгыртымыланда. Шкенан исторический Родине гыч пурышо кажне уверлан, йыҥгырлан ме чот йывыртена да аклена. Ме, Черепановский посёлкышто илыше марий-влак, кодшо курымын 50-ше ийлаштыже Татарсанысе Агрыз районысо Кедрек, Буймо ялла гыч тышке илаш куснышо марий-влакын тукымышт улына. Тунам 30 наре еш тыш толын улмаш. Варажым южышт вес верыш кусненыт, мӧҥгешат пӧртылыныт, кодшыжо ешым чумыреныт да тышан лакемыныт. Мутат уке, шочмо калыкнан йӱлажат мондалт толын. Но 2008 ийыште ме верысе тӱвыра пӧртыштӧ, тудым мый шкак вуйлатем, Алтай крайысе губернаторын темлыме проектым илышыш пуртенна да тудым «Марий тӱвыра отро» манын лӱмденна ыле. Тудын кышкарыште марий тӱвыра да йӱла дене палдарыше полем-тоштерым ыштенна, «Ручеёк» йоча куштышо ансамльым (вуйлатышыже Любовь Лопарева) чумыренна. Коллектив шкенан Змеиногорский районышто да Алтай край кӱкшытан мероприятийлаште эре шке мастарлыкышым ончыкта да ойыртемалтеш.

А 2018 ийыште «Алтай мари» автономийым ыштенна. Моло тыгый автномий-влак денат кылна сай. Тачысе кечылан могай мемнан нелылык уло, йодыда? Ме кундемысе рӱдола — Барнаул — да шочмо кундемна деч пеш тораште илена. Шочмо велыш миен толашат йӧн уке гаяк. 2017 ийыште Татарстаныште лийынна ыле. Тунам мемнам пеш порын ты республикысе марий-влакын калыкле-тӱвыра автномийыштым вуйлатыше Олег Третьяков вашлийын. Кужу жаплан шарнымаш кодын.

Но шочмо йылмым арален кодымо да вияндыме шотышто садак тургыжланем. Ӧрдыжтӧ илышыла кузе тидым ышташ? Тиде амал денат ме Марий калык погыным эртарыше-влак деке йодмаш дене лекнена. Мемнан гай ӧрдыжтӧ илыше марий-влак ушышо НКО-влак дене кузе-гынат кылым саемдаш да пенгыдемдаш ыле? Мыланна тиде кыл моткоч кӱлеш. Меат тендан эртарыме форумлаште, тӱшка погынымаште участвоватлынена. Ме шке шинча дене, тендам ужшаш, пылыш дене колшаш улына, тунам тыштат шкенан йылмынам, тӱвыранам, йӱланам вияҥдаш, арален толаш тыршаш тӱҥалына. А тидым ыштен кертына, у тукымлан лиеш мом кодаш. Ме чынже денак шкенан ойыртемалтше марий тӱвырана, геройна-влак, исторический шочмо кундемна дене кугешнена.

Марий калык погыныш чумыргышо чыла делегатлан кугу саламым каласынена да сай паша лектышым тыланена.

Чонлан йосырак: ме, тыште илыше марий-влак, йӧршеш посна илымыла чучына, мо тендан дене ышталтме нергенжат пешыже огына пале. Тендан дене кылым ышташыжат Интернет да родо тукым-влак веле полшат. Тиде пеш сай гынат, но садак шагал. Сандене марий калыкым иктыш чумырышо форумлаш мемнамат ушашак йодына.

С.НОСОВА

Опубликовать в Одноклассники

Добавить комментарий