Мут – делегатлан
Игорь Иликбаев, Свердловск область, Екатеринбург ола, «Урал кундем» мер организаций вуйлатыше:
— Екатеринбургышто илыше марий-влакым ушышо организацийна кугужак огыл. Туге гынат ме марий калык, йылме, тӱвыра, историй дене кылдалтше мероприятийым Свердловскысе межнациональный лудмывер дене пырля шагал огыл эртарена. Шкенан «Яндар памаш» калык лӱмым нумалше фольклорно- хореографический ансабмлят (вуйлатышыже Зинаида Пазугутова) пашам ышта. Ынде кумшо гана калык лӱмжым пеҥгыдемдаш ямдылалтеш…
Нелылыкше теве кушто, Марий Эл дене кылна начаррак. Ме «шкенан подышто гына шолына» манаш лиеш. Мыйын шонымаште пашанам саемден колташ полшышо темлымашыже Марий Эл гычат утларак пурышаш, молан манаш гын марий мер илыш лач тушто шолеш. Меат тушто мо ышталтме нерген пален шогышаш улына. Эсогыл тӱвырам вияҥдыме кыл шотышто кыл начар, кеч Свердловск область дене Марий Эл коклаште тӱвыра кылым вияҥдыме шотышто ойпидышат ышталтын. Мутат уке, артист, творческий коллектив-влак толыт, но шуэн манаш лиеш. А моло сферым авалтыше кыл нерген ойлыманат огыл. Сандене шке пашанам кузе моштена, туге ворандарена, лектеш.
С.НОСОВА
