Звенигово районысо И.С.Ключников-Палантай лӱмеш Какшамарий школын тунемшыже Алексей Скворцов «Горячее сердце» оҥ знак да диплом дене палемдалтын.
«Горячее сердце» — тиде общественный награде. Тудо неле илыш ситуацийым сеҥаш да полшаш кумылым ончыктымылан кучыкталтеш.
Алексей кодшо кеҥежым йолташыжым утараш полшен. Пырля модмышт годым тудыжо чараҥше электровоштырым кучен. Ток перыме деч утараш манын, рвезе пу тоям налын да электорвоштырым йолташыж деч кораҥден, вара амбулаторийыш наҥгаяш полшен. Туштыжо тунемшылан икымше медицине полышым пуэныт. Алексейын ойлымыж почеш, тыге ышташ нуным школышто ОБЖ урокышто туныктеныт.
Наградым, дипломым да чап книгам кодшо кечылаште Какшамарий школышто торжественно кучыктеныт. Тушто Марий Эл Правительстве председательын икымше алмаштышыже Михаил Васютин, республикысе образований да науко министрын алмаштышыже Нонна Антоничева, районысо кучем гыч еҥ-влак лийыныт.
Тыгак Алексей Скворцов «Орлёнок» Всероссийский йоча рӱдерыш каяш путевко дене палемдалтын. Тушто рвезе тений кеҥежым 10 гыч 31 август марте каналтен кертеш.
Л.Камалетдинова.
