«Моско марий тӱвыра рӱдер» республикысе Марий тӱвыра рӱдер дене пырля кызытсе марий муро да сем конкурсым увертарен.
Текстым да музыкальный произведенийым возышо автор, тыгак посна, мужыр, тӱшка дене йоҥгалтарыше-влакым тушко ушнаш ӱжыт. Конкурсыш мурым але музыкальный произведенийым йоҥгалтарыман видеом колтыман. Сеҥышым жюри веле огыл, интернет тӱняште «коштшо» да колыштшо, ончышо-шамычат ойыраш полшат. Нунын лайкышт ты але вес конкурсантлан ончыко лекташ полшен кертыт.
Ойыртемалтшылан конкурсын спонсоржо «Служба видеомаркетинга» организаций видеоклипым ышташ 100 000 теҥгем кучыкта. А тудым Москваште войзаш тӱҥалыт. Ойыртемалтше 10 участникым Марий тӱвыра рӱдерат палемда.
Конкурс иктешлалтмеке, гала-концертым Йошкар-Олаште эртарышаш улыт.
С.НОСОВА