2018 ий тӱҥалтышлан республикысе медицине тӧнежласе учётышто ӱдырамаш да пӧръеҥ исырлык дене орланыше 808 пациент шоген. Тений экстракорпоральный йӧн дене тӱлаҥдыме (ЭКО) 300 процедурым эртараш палемдыме.
ЭКО йӧн республикыштына 2013 ий гыч ОМС кышкарыште кучылталтеш. Тидын дене келшышын, тудым пациент-шамычлан чылт яра ыштат.
Кодшо ийын 293 процедурым эртарыме, ты шотыштак 38 ЭКО-м Марий Эл деч ӧрдыжтӧ ыштыме.Ӱдырамаш консультацийлаш мӱшкыраҥше 112 пациентым учётыш налме. 83 ӱдырамаш азам ыштен. Чылаже 96 йоча шочын. Кызыт 23 еҥ процедурым эрта. Лишыл жаплан эше 60 ӱдырамашым ямдылыме.
– ЭКО-м ыштыме йодыш дене шке кундемысе ӱдырамаш консультацийын участковый врачше але Йошкар-Оласе Медсанчастьысе врач-репродуктолог деке кайыман, – умылтара 1-ше №-ан медсанчастьын 2-шо №-ан гинекологический отделенийжым вуйлатыше Светлана Королёва.
ЭКО-ш направленийым налме алгоритмым Марий Эл Республикын Тазалыкым аралыме министерствыжын сайтышкыже «Женское здоровье и материнство» разделыш вераҥдыме.
Процедур деч вара мӱшкыран ӱдырамаш-шамычым 1-ше №-ан медсанчастьын поликлиникыштыже але Республикысе перинатальный рӱдерын консультаций-диагностике поликлиникыштыже эскерат. Районлаште илыше пациент-влак верысе медицине тӧнежыште але Исырлык шотышто рӱдерыште очно да заочно консультацийым налын кертыт.
М.ИВАНОВА.
