Йошкар-Олан мэрже Евгений Маслов кодшо кугарнян Какшан сер мучко теле деч вара улшо сӱретым ончен терген коштын.
Вӱд воктене верланымылан кӧра ятыр вере шаланымым ужаш лиеш. «Спар» кевыт воктене, Амстердам эҥерӱмбалне кумылым волтышо сӱрет палдырна. Тӱжвач гына олмыктымаш келшен ок тол, чыла тидым капитально олмыктыман. «Тыгай пашалан ола тымарте оксам ойырен огыл, тений икмыняр миллион теҥгем ойыраш палемдыме», – ойлен Е.Маслов. Ятыр вере гранит плита-влак шаланеныт, нунымат вашталташ шуко окса кӱлеш. Осал койышан еҥ-влакат лӱмын шалатылыт, мэр олаште илыше-влакым ола погым перегаш ӱжын.
Л.СЕМЕНОВА
