1 июнь гыч Российыште икмыняр у закон вийым налын.
Ынде тылзе еда тӱлыман йоча выплатым регистрацийым ыштыме верын веле огыл, тыгак чынже денак илыме верын адресышт почеш налаш лиеш. Тымарте тыгай сынан социальный полышым пропискым ыштыме кумдыкышто гына пуэныт.
1 июнь гыч Российыште мобильный сеть-влак кокласе роумингым официально кораҥдыме. Рашемденрак каласаш гын, ынде регионлашке лекме годым сото кыллан ешарен тӱлымӧ шотышто тургыжланышаш уке. Чын, шуко оператор тиде системыш законым илышыш пуртымо деч ончычак куснен.
2019 ийысе кеҥеж завещанийым возымо нормышкат вашталтышым пуртен: ынде вате ден марий ик документым ыштен кертыт. Тиде йӧнан – завещанийым возымо деч ончыч мужырлан пырля чумырымо погым пайлаш огеш кӱл.
Июнь тӱҥалтыш гыч автомашинан оратажым вашталташлан разрешенийым налме процедур простаҥын. Тидыже эн ончычак тюнингым йӧратыше да топливо шотеш газ дене пайдаланаш шонышо-влак дене кылдалтын.
Российыште цифровой телевиденийыш куснымо кумшо этап эртен. Тушко Марий Элнат логалын. А октябрь кыдалне элна тӱрыснек у телевиденийыш кусна.
М.ИВАНОВА
