УВЕР ЙОГЫН

Кум пачаш шергештын

Тений 10 тылзыште Российыште продукт Евроушем дене таҥастарымаште кум пачаш шергештын.
2020 ий январь-октябрьыште элыштына продуктлан ак 4,1 процентлан кугемын. Тыгодымак Евроушемыште тудо 1,4 процентлан гына шергештын, палдара Росстат.
Российыште кочкыш продукт 0,8 процентлан шергештын, Евросоюзышто – 0,3 процентлан. Элыштына январь-октябрьыште эн чотшо — 11,8 процентлан – сакырлан, джемлан, шоколадлан, кампетлан акым кугемденыт, Евроушемыште – улыжат 0,9 процентлан. Тыгак емыж-саска 10,8 процентлан шергештын, Евроушемыште — 8,4 процентлан.
Кинде-булко изделийлан, шӱрашлан, тыгак ӱй ден коялан ак 6,8 процентлан кугемын, Евроушемыште кинде-булко изделий ден шӱраш 0,9 процентлан шергештыныт, ӱй ден коя 0,6 процентлан шулдештыныт.
Российыште кол ден теҥыз продукт 3,5 процентлан шергештыныт (Евроушемыште – 0,9 процентлан), шыл ден шыл продукт – 2,1 процентлан (Евроушемыште – 1,6 процентлан), шӧр кочкыш, сыр да муно – 2,0 процентлан (Евроушемыште – 0,6 процентлан).

М.ИВАНОВА ямдылен

Опубликовать в Одноклассники

Добавить комментарий