Каныш кечылам але яра жапым кажныже шке семынже эртара. Тыгай годым иктышт унала але иктаж-кушко экскурсий дене лектын кошташ тыршат, весышт мӧҥгыштӧ лияш кумылан улыт, кумшышт тӱрлӧ кидпашам ыштат, чон йодмо сомылыштым шуктат.
Йолташ-влак яра жапым кузе эртарат? Каныш кечылаште мом ышташ йӧратат?
Наталья ПУШКИНА, Марий тӱвыра рӱдер вуйлатыше:
– Паша дечын вара еш да мӧҥгӧ дене кылдалтше сомылым шуктем але иктаж мероприятийым эртарем.
Эвика СИВАКОВА, «Именно» интернет-журналын пашаеҥже (Санкт-Петербург):
– Каныш кечым еш але йолташ-влак дене эртараш тыршем: паркыште пырля коштын кертына, театрыш миен толына. А тыглай кечын кастене эргым дзюдош коштыктем але мӧҥгыштӧ онлайн курсым эртем.
Вера КАБИРОВА, «Вестник района» газетын тӱҥ редакторжо (Советский район):
– Паша деч вара шукыж годым адак пашамак ышташ логалеш. Тиддеч посна ӱдырем дене урокым ыштена, кас кочкышымат ямдылен шукташ тыршем. Каныш кечемат тыглай дечын пешыжак огеш ойыртемалт, но эше мӧҥгыштӧ эрыктыман. Яра жап лийме годым книгам лудаш йӧратем. Историй, тӱрлӧ приключений, йӧратымаш нерген лудаш келша. Книга моткоч шерге поянлыклан шотлалтеш, вет пагытын йодмыж почеш, кызыт шукын интернетыште «шинчат», эсогыл пашаштат тидлан шуко жап ойыралтеш.
Екатерина АЛЕКСАНДРОВА, М.Шкетан лӱмеш Марий национальный драме театрын актрисыже:
– Кызыт йоча дене мӧҥгыштӧ улам, жап лийме семын оратор искусство студийыштем пашам ыштем. Студийым «ОРодром» манын лӱмденам. Каныш кечылаште УнаКудышто унала толшо турист-влакым вашлияш полшем, нуным куандараш тыршем. Яра жапыште йоча-влак дене кинош, эҥер воктеке лудо-шамычым пукшаш коштына. Чон йодмо почеш южгунам йӱдым шканем але икшыве-шамычлан вургемым ургаш шинчын кертам.
Татьяна ПОПОВА, Марий самырык театрын актрисыже:
– Шке пӧртыш илаш куснымеке, сурт кӧргыштӧ шогылташ пеш келша. Изирак пакчам уло, шуко тӱрлӧ пеледышым шындылам. Чоҥымо паша келшаш тӱҥалын, садлан пелашемлан кертмем семын полшаш тӧчем. Лач мӧҥгыштӧ еш пелен чонем кана.
Ирина ЮШКИНА, самырык мурызо:
– Яра жапыште книгам лудаш тыршем. Игече мотор годым пеледыш дене жапым эртарем. Ятыр ий пеледышым ӱдем, куштем да вара нуным ялыште шындем. Олаште илем гынат, кажне каныш кечылан йӧратыме солашкем каяш тыршем, вет тушто чонемлан лишыл пашам шуктен кертам. Пеледыш пеледмыжак мочол кумылым нӧлта!
А.БАЙКОВА
