Марий музыкальный искусствым вияҥдымаште да тудым сылне сем, муро дене пойдарымаште композитор, Марий Эл Кугыжаныш премийын лауреатше, Марий АССР искусствын заслуженный деятельже, Марий Элын калык артистше Виталий АЛЕКСЕЕВЫН надырже моткоч кугу. Таче Виталий Михайлович шке вачӱмбакше 75 ийым пыштен.
Театрыште – коло утла ий
Марий семмастар дене чапле лӱмгечыж вашеш вашлияш шонен, ик кечын мӧҥгысӧ телефонышкыжо йыҥгыртышым. Пӧръеҥ йӱк эркынрак шоктыш. Кушеч да кӧ улмем рашынрак каласымеке, Виталий Михайлович тугак вашештыш: «Таче изишак ом керт, эрла кечывал деч ончыч иктаж лу шагатланрак йыҥгырте.» Вес кечын палемдыме жапыште каласымым шуктышым, Виталий Михайловичын йӱкшӧ сайынрак шоктыш. «Уремыш пешыжак лектын коштмаш уке, лучо пачерышкем тол, ласкан мутланена. Индеше эртымекырак, адресем сералте», – ойлыш тудо. Кид йымалне улшо блокнотеш лӱмлӧ еҥын кушто илымыжым сералтышымат, шке пашам ышташ пижым. Ик лаштык почеш весым лудам (дежурный лийынам тиде кечын), а ушышто Виталий Михайловичлан пуышаш йодышем-влак пӧрдыт.
Кугарнян эрдене палемдыме жаплан сералтыме адрес почеш Изи Какшан вес могырышкыла маршрутко дене кудальым. Шинчам дене ваштареш улшо пӧртын балконлажым ончыштам. Кудымшо пачашыште пӧръеҥын окна гыч ончымыжо палдырныш: ужаргалге тувыран, чал ӱпан… Виталий Михайловичым пален нальымат, кидем кӱшкӧ нӧлталын, саламлалтым да подъезд омсам почын пурышым.
Омса гоч вончымеке, илалше еҥ порын вашлие да залышке эрташ темлыш. Ты пӧлемыште, мутат уке, семмастарын фортепьяножо – ик эн ончыл верыште.
– Коклан темдыштам, йокрок лийме деч. Шукерте огыл «Кугезе муро» сюитым возен шуктенам. Але тудым нигӧ колын огыл, – каласыш Виталий Михайлович да, семӱзгар петыртышым почын, паҥгалам темдышташ тӱҥале. – Але теве настроитлаш кӱлеш, тидлан ала кидем ок шу, ала изишак ом керт да…
– Кум сборникем эше савыкталтде кия, – ешарыш семмастар. – Шке жапыштыже симфонический, камерный оркестрлан шуко возенам. Очыни, шийвундо тидлан огеш сите…
Виталий Михайлович марий театр искусствым вияҥдымаштат чот тыршен. Тудо коло утла ий М.Шкетан лӱмеш Марий драме театрын музыкальный ужашыжлан вуйын шоген. Тынар ий жапыште мочол спектакльым сылне сем дене сӧрастарен, да мочол постановкылан мурым возен?!…..
А.БАЙКОВА
Авторын фотожо
Материалым умбакыже «Марий Эл» газетыште лудаш темлена.
