10 апрельыште Марий самырык театр «Ош волгенче» спектакльын премьерже дене зал тич погынышо калыкым куандарыш.
Пьесын авторжо – драматург Юрий Соловьёв, а постановкым сценыш лукташ Россий искусствын сулло деятельже, режиссёр Олег Иркабаев ямдылен. Авторын лӱмжӧ театр искусствышто чылт палыдымыжак огыл. Тудын возымо «Йыван Кырла» пьесыж почеш драмым 2009 ийыште поэт да киноактерын 100 ияш лӱмгечыж вашеш режиссёр-влак Роман Алексеев ден Алексей Ямаев сценыш луктыныт ыле. А Марий самырык театрыште «Ош волгенче» – Юрий Ильичын икымше пашаже. Тудым автор 2011 ийыште серен, «Эн сай пьесе» конкурсыш аклаш луктын.
Спектакльым ончаш толшо-влак шокшын вашлийыч: тушто тарватыме темыжат калыклан пеш лишыл. Илыш – Юмын пуымо пӧлекше. Тудым моштен, икте-весым пагален, йӧратен да аклен, изиракшым изираклан, кугуракшым кугураклан шотлен илыман да шке почеш сай, поро кышам кодыман. Илышыште сайжат, осалжат лиедат, но чылаж годымат айдеме лийын кодман, вет илышын кузе савырнымыжым ончылгоч пален шукташ ок лий. А йӧратымаш – илышын юзо шӱлышан шижмашыже, йӧратыман ача-авам, икшывым, йыр улшо пӱртӱсым…
Спектакльыште ик ешын илышыже…
! Тичмаш материалым 15 апрельыште лекше газетыште лудса!
А.БАЙКОВА
И.Речкинын фотожо
