Тений январь гыч Марий Элыште илыше-влак йӧралтше пушеҥгым разрешительный документ деч посна шке кӱлешлыклан ямдылен кертыт.
Тидын шотышто кодшо идалык мучаште 27 декабрьыште Марий Элын Кугыжаныш Погынжо «Марий Эл Республикын чодыра отношений областьыште полномочийжым шуктымо нерген» (2007 ий 31 май) законыш вашталтышым пуртен. Ынде оза-влаклан, кӧн илыме верже пожарлан кӧра локтылалтын, тудым олмыкташ чодырам налмышт годым тӱлаш 0,5 коэфициент кучылталтеш. Тидлан кӧра граждан-влакын илыме верыштым кредитым налде шотыш кондаш йӧнышт лектын. Но тидын годым Марий Элын Пӱртӱс поянлык, экологий да йырым-йырысе средам аралыме министерствыш чодырам ойыраш йодмаш дене лекме годым граждан-влакын пожар лиймым пеҥгыдемдыше документышт лийшаш, тудым Россий МЧС-ын Марий Элысе Тӱҥ управленийже пуышаш.
Йӧралтше пушеҥгым шке кӱлешлыклан погымо шотыштат законышто вашталтыш уло. Тудым ынде «пушеҥге огыл чодыра ресурслан» шотлымо да разрешительный документ деч посна ямдылаш лиеш, эсогыл арендатор-влакын чодыра кумдыкыштыштат. Тудым погымо годым кидыш кучыман да бензомоторан ӱзгарым кучылташ лиеш, но тушто кушшо самырык кушкыллан эҥгекым гына ыштыман огыл. Тыгак пум оптымо верым почеш эрыктен кодыман, пожар ылыж кертмым эскерыман.
С.Носова
