ЙӰЛА

Ача-аван чон шокшыжлан мо шуэш?!

Шошын пытартыш кечынже, 31 майыште, Йоча-влакым аралыме тӱнямбал кечылан пӧлеклалтше «Марий Элын икшывыже-влак» да «Ешем – поянлыкем» республик кӱкшытан кок конкурсым иктешлышт.

РФ Кугыжаныш Думын депутатше Светлана Солнцеван тӱҥалмыж почеш, нуно кокымшо ий почела, адакшым ондакысе верыштак — Медведево поселкысо 3-шо №-ан школышто — эртаралтыч, сандене тиде поро йӱлашке савырнен манашат келшен толеш. 

 

Шкежат марла кушталтыш!

Погынышо икшыве, еш да уна-влакым Светлана Солнцева, Марий Элын образований да науко министрже Наталья Адамова саламлышт. Тыгак верысе школын тунемшыже-влак мурымаш да куштымашышт дене куандарышт. А кумдан палыме мурызына Зоя Берникован такмак-влакым йоҥгалтарымыж жапыште кумылан-шамыч эсогыл пырля кушташ лектыч! Светлана Солнцева, вуйым шупшде, нунын деке уло кумылын ушныш да марла куштен мурыш. Теве тыге!

 

«Марий Элын икшывыже-влак»

Тылеч вара тиде конкурсым иктешлаш тӱҥальыч.

«Шочмо кундемын патриотшо-влак» номинацийыште  Звенигово район Красногорский поселкысо 1-ше №-ан школжын командыже (группо вуйлатыше-влак – Ольга Алкина, историйым да обществознанийым туныктышо ден школ директор Галина Гатауллина) сеҥен.

 «Медиарӱдер-влакын лидерышт» номинацийыште Шернур районысо  Лажъял школын командыже (вуйлатыше — Алевтина Смородинова, биологийым туныктышо) ойыртемалтын.

«Ончыкылыкын режиссёржо-влак» номинацийыште Курыкмарий районысо Йоласал школын командыже (вуйлатыше — Людмила Кузнецова, кугурак вожатый) эн чолга да уста лийын.

«Самырык волонтер-влак» номинацийыште Медведево поселкысо 2-шо №-ан школын командыже (вуйлатыше – Наталья Кудрявцева, директорын  воспитательный паша шотышто алмаштышыже) — палемдалтын.

«Шочмо кундемын патриотшо-влак» номинацийыште Волжский районысо Карай школын (вуйлатышыже – Любовь Сергеева, школ директор), Йошкар-Оласе 9-ше №-ан школын (вуйлатышыже – Татьяна Павлова, историйым туныктышо) командыже-влак да «Самырык волонтёр-влак» номинацийыште Параньга районысо Лажмарий школын командыже (вуйлатышыже – Лидия Дождикова, руш йылмым да литературым туныктышо) посна приз дене палемдалтыч.

Сеҥыше ден ойыртемалтше-влаклан Кугыжаныш Думын депутатше шергакан пӧлекым, дипломым да сертификатым кучыктыш.

 

«Ешем – поянлыкем»

Тиде конкурс, «Единый Россий» партийын «Пеҥгыде еш» проектшым илышыш пуртымо дене келшышын, ача-аван полышыж деч посна кодшо йоча-влакым кумылаҥдыме шонымаш дене эртаралтын. Санденак  конкурсыш тыгай икшыве-шамычым ашнаш налше еш-влак ушненыт ыле.

Мероприятий тӱҥалме деч ончычак погынышо ден уна-влак еш-шамычын шкешт да усталыкышт дене палдарыше стендыштым ужын да аклен кертыч. А нунышт мом гына ямдылен конден огытыл?! Мутлан, Оршанке район гыч Рыбаковмыт еш стендыштым изи паровоз семын келыштареныт, тыгак тӱрлӧ когыльым кӱэшт конденыт. Марий Турек вел гыч Смирновмыт тӱрлӧ сӱретым, тӱрым, изи кашпо-шамычым ыштеныт да ончыкташ луктыныт ыле. А теве У Торъял район гыч Фоминыхмыт еш, рашрак каласаш гын, озавате, шӱрашан мелнам кӱэшт конден да уло зал тиде тамле пуш дене ӱпшалтын, шӱвылвӱдым луктын!

Конкурсын участникше-влаклан, а тений тушко 7 еш ушнен, 4 тӱрлӧ тергымаш гоч эрташ кӱлын. Иктыже, мутлан, «Еш – элын тӱҥжӧ» маналтын да тушто кажныже шке еш историйже дене палдарыш. Иктышт видеопрезентацийым ямдылен конденыт да тыглай каласкалышт гын, весышт почеламут корнылам шкештак возен, сылнын келыштарышт. Поснак изи чукай-шамычын чотак тыршымышт шижалте.

Еш-влак усталыкыштымат ончыктышт. Мутлан, Фоминыхмыт ешыш ашнаш налме кок эрге ден кок ӱдырын почеламутым лудмышт да авашт дене пырля сылне марий сем почеш «йыр куштымаш» номерым ончыктымышт шукыштлан келшыш. Адакшым нуно чыланат марий тӱран вургемым чиеныт ылят, моло-влак коклаште тунар моторын койыч!

 

Сеҥыше-влак

Жюрин иктешлымашыж почеш, «Ончышо-влакын симпатийышт» приз дене Йошкар-Ола гыч Матвеевмыт, «Ойыртемалтше еш» номинацийыште Медведево район гыч Митяковмыт, «Эн келшен илыше еш» номинацийыште У Торъял район гыч Фоминыхмыт, «Эн шуко шочшан еш» номинацийыште Шернур район гыч Семеновмыт палемдалтыч.

III-шо степенян дипломым да 10000 теҥгелан сертификатым Морко район гыч Фёдоровмытлан, II-шо степенян дипломым да холодильный оборудованийым Оршанке  район гыч Рыбаковмытлан кучыктышт.

Ты гана конкурсышто Марий Турек район гыч Смирновмыт еш сеҥыш. Нунылан плазман телевизорым пӧлеклышт.

 

Ашнаш налаш кумылаҥдыман

Конкурс-влакым иктешлыме семын Светлана Солнцева тыге палемдыш: участник-шамычын лидер качествым вияҥдыме да командыште пашам ыштыме шотышто ойыртемалтше шонымашышт вес проект-влаклан тӱналтышым пуышо семын улыт.

Тыгак правительстве ашнаш налше еш-влаклан полшаш, опекыш да ашнаш налаш еҥ-влакым эшеат кумылаҥдаш манын, тыршенак пашам ышта, тыгай еш-шамычлан оксамат утларак тӱлаш тӱҥалын манын каласыш.

— Ме чыланат – кугыжаныш ден обществе – тулык икшыве-шамыч шке ешыштым муышт манын тыршышаш улына. Конкурс полшымо дене ты неле йодышлан тӱткыш утларак ойыралташ тӱҥалеш да нуным рашемдаш лийме у корно ден йӧн-влакым темла манын шонем, — палемдыш депутат Светлана Солнцева.

Любовь КАМАЛЕТДИНОВА.

М.Скобелевын фотожо.

Опубликовать в Одноклассники

Добавить комментарий