Чебоксарыште тиде кечылаште тӱнямбал кӱкшытан XV кинофестиваль эрта.
Мо дене мыланна тудо оҥай лийшаш? Тушто икымше гана этнический да региональный конкурс кышкарыште Курыкмарий кундемын шочшыжо Андрей Огородниковын шукерте огыл войзымо «Онаеҥ» документальный фильмже ончыкталтеш. Продюсерже да сценарийыжым возышыжо автор шкак лийын. Оператор семын Дмитрий Новиков тыршен, а музыкым композитор Григорий Архипов возен.
Фестиваль кышкарыште фильмым яра ончыктат, сандене тушко миен толаш йӧн уло. 3 июньышто «Чувашкино» госкиностудийын» кинозалыштыже 12 шагат кечывалым, а 4 июньышто «Волжский» кинотеатрын кумшо залыштыже 16 шагатлан сеанс-влак лийыт.
Каласен кодыман, фильм але марте ик гана веле авторын лишыл еҥже-влаклан ончыкталтын. Тыгак онаеҥ-влакым ӱжыныт улмаш. Мо сай, могай ситыдымаш уло – акым пуэныт. А теве ынде фильмым тӱшка калыкат аклен кертеш.
Мо нерген вара тудо? Авторын кино нерген иктешлымашыж гыч: Уло тыгай шонымаш, тӱня кавасе кайыклудын муныж гыч лектын, а айдеме нимучашдыме океан пундаш гыч чумырымо йошкын гыч чумыралтын. Мемнан элын Европысо ужашыжын эрвелныже мари лӱман калык ила. Нунын тӱняумылымашышт да национальный тӱвырашт курымла дене вияҥ толыныт. Таче кече марте марий-влак шке ойыртемыштым арален коден кертыныт, таклан огыл нуным «пытартыш язычник» семын палемдат. А тӱшка марий калыкын кумалме шомакшым Ош Кугу Юмо деке нунын коклаште кылым кучышо онаеҥ намиен шукта. Лач тыгай онаеҥ нерген ты фильм. А тӱҥ геройжым, шкенжым, Кужэҥер районысо онаеҥ Альберт Рукавишников модын.
Андрей Огородниковын шке соцкылысе лаштыкыштыже возымыж почеш, фильмлан постерым тале марий сӱретче Юрий Таныгин ыштен.
С.Носова
Фотом А.Огородниковын соцкыл лаштыкше гыч налме.
