Марий йӱлан чинче тушыжо:
Сӱан годым ӱдырым каче деке кондымеке, почеш толшо-влакын сугыньлен мурымо мурышт:
«Ӱстембал ӱштмӧ куштырадам
Кӱварыш ӱштын ида шу.
Кӱвар гыч ӱштмӧ куштырадам
Пӧртӧнчык луктын ида шу.
Пӧртӧнчыч ӱштмӧ куштырадам
Уремыш луктын ида шу.
Ош шовычын йолважым
Нигӧланат кӱрышташ ида пу.
Мемнан кондымо шӱжарнажым
Еҥлан мыскылаш ида пу».
В.Т.Михайловын «Калык ойпого – калык чон поянлык» книгаж гыч налме, 2017 ий.
Черке йӱла почеш:
5 август – Юмынаван Почаевский юмоҥажын кечыже.
6 август – Благоверный князь Борис ден Глебын кечышт.
8 август – Марий кундемысе священномученик Сергий Стрельниковын кечыже. Иоанн Предтечын Шочмыжо лӱмеш Оршанкысе черкын пайремже.
9 август – Чот орланыше святой Пантелеймонын кечыже. У Торъял районысо Масканур черкын пайремже.
10 август – Юмын Аван Смоленский («Одигитрия») юмоҥажын кечыже; Волжский районысо Пӧтъял-Азъял черкын пайремже.
Юмынаван Смоленский «Одигитрия» юмоҥаже лӱмеш тропарь:
«Юмын Шочмо Аваж деке ме, сулыкан да ӱҥышӧ-влак, уло кумылын толынна да кумалына, сулыкым кудалташ кӧргӧ чон дене йодына: «Владычице, полшо, мемнам чаманен, тырше, шуко сулыкым ыштымына верчын ме ынде йомна; мыланна, Шкендын айдемет-шамычлан, порым ыштыде ит кодо; Тыланет веле, Иктылан, ӱшанена».
«Марла молитва-влак» книга гыч налме,2005 ий
Шарнаш кодшо ой:
Ик лум лу гана огыт нулто.
Илыш шолын ок шого гын, тудын вийжым ужаш ок лий.
Йодын толшылан пуэн колто, шужен толшым темен колто.
Йӧратымаш гыч тӱнян мурыжо шочеш.
А.Е.Китиковын «Марий калыкмут мутер» книгаж гыч налме,1990 ий.
Ӱмырым илен эртарышын каҥашыже:
Илышыште жапым, шомакым да йӧн пуалтмым мӧҥгеш пӧртылташ огеш лий.
Нигунам ласкалыкым, ӱшаным да чапым йомдараш огеш кӱл.
Илышыште йӧратымаш, шке шонымаш улмым да ӱшаным аклен моштыман.
Власть, пиал, шкем шижмаш эре вашталт кертыт.
Айдемым паша, чын илымыже да сеҥымашыже чапландара.
Айдемым кӧранымаш, кугешнымаш, осал улмыжо лунчырта.
Илышыште «Мый тыйым йӧратем», «Проститле мыйым» да «Полшо мыланем» манын ойлаш эн неле.
С.Носова ямдылен
Снимкыште: Волжский район Упшер ял воктене йогышо изи эҥер пеш мотор.
Авторын фотожо
