10 январьыште Икымше канал дене ончыкталтше «Поле чудес» телешоушто Медведево районысо Нужъял гыч Екатерина Кудрявцева суперпризым модын налын. Садлан ты кечын мыланна, Марий кундемыште илыше-влаклан, передачым поснак куанен ончаш да марий улмына дене эшеат кугешнаш амал лийын.
Пӱсӧ уш-акылан
Екатерина кумшо турышто Омск область да Моско гыч мийыше участник-влак дене пырля модын. Пеленже Богдан эргыжым намиен. Кандаш ияш рвезе тукым акаж дене пырля телепередачым вӱдышӧ Леонид Якубовичлан почеламутым лудын пуышт. «Юзо пасу» да уста вӱдышӧ нерген сылнымут корнылам Кудрявцевмыт ешыште шкештак возеныт. Верысе тӱвыра пӧрт пеленысе «Ошла сем» фольклор ансамбль гармонь, тӱмыр почеш весела такмак-влакым йоҥгалтарыш. Марла муралтымышт кумылым нӧлтыш, а ӱдырамаш-шамычын чиен мийыме ужар сывынышт, рывыж упшышт, йыли-юли волгалтше шийдарманышт калыкнан тӱвыра ден йӱлам арален толмышт нерген раш палдарышт.
Кумшо турын йодышыжо мелна да кочкыш йӧрвар дене кылдалтше ыле. Тидлан Екатерина чын вашмутым пуыш да финалыш лекте. Туштыжат тудо чолгалыкым ончыктыш да супериграште модо. Чаманаш кодеш, Екатеринан, пытартыш гана барабаным пӧрдыктымекыже, очкожо «йӱлыш». Туге гынат Леонид Аркадьевич пӧлекым ойырен налаш темлыш. Фельдшерлан тыршыше ӱдырамаш, пашажлан кӱлеш манын, ноутбукым нале.
Супериграштат йодыш мелна денак кылдалтше ыле. Екатерина шола гыч пурлашке верланыше мутшым палыш да мӧҥгысӧ кинотеатрым модын нале.
Марий ӱдырамаш тыматле койыш-шоктышыжо, шкенжым шот дене кучымыж дене веле огыл, ушан улмыж денат моло дечын ойыртемалте. Тидым эсогыл йӧратыме передачынам вӱдышӧ Леонид Якубовичат палемдыш.
Эргыжын шонымашыже
Кудрявцевмыт ешыште «Юзо пасу» передачым шукертсек йӧратен ончат.
– Тушко модаш каяш Богданын шонымашыже лийын. Тудо шукертак мылам темлен, Леонид Аркадьевичын чылалан пӧлекым пуымыжо келшен. Шуко шонен коштынам да эртыше идалык мучаште, ноябрьыште, онлайн йӧн дене йодмашым, шке да еш нерген кӱчыкын возен колтенам. Кок арня гыч йыҥгыртен, модаш ӱжыныт да пелен усталык коллективым кондаш темленыт. Ӧрмем дене нимом вашешташ тоштын омыл, ты шотышто ешыште каҥашаш кӱлмӧ нерген веле ойленам, – чонжым почо Екатерина.
Куаныше да тыгодымак ӧрмалгыше ӱдырамаш ӱжмаш шотышто эн ончычак аважлан каласен. Тудыжо моткоч куанен да «Ошла сем» ансамбльын участникше-влакланат каласен. Нунат телепередачыште мураш кумылан лийыныт. Екатеринан аваже ынде ятыр ий тиде ансамбльыш коштеш.
– Авам ынеж кай ыле, вет ялыште ушкалым монь лӱштыман, – ешарыш Кудрявцева. – Тый от кай гын, тугеже мыят ом кай манмылан авам корныш тарванаш кӧныш. Тыге ме: авам, мый, Богдан эргым, изамын Валерия ӱдыржӧ – 19 декабрьыште поездыш шична, а «Ошла семын» участникше-влак – вес кечынже.
Тургыжланеныт
Тыгай съёмкышто Кудрявцевмыт икымше гана лийыныт, садлан моткоч тургыжланеныт.
– Модмо жап пеш писын эртен. Мом да кузе ыштышашым чыла умылтареныт. Икымше да кокымшо турым кечывал деч вара кокыт гыч ныл шагатат пеле марте сниматленыт, шкенан жапым вучен-вучен ярнен пытенна, – радамла Якубовичым ужшо. – Кумшо турын съёмкыжо тӱҥалмеке, йоча-влакат тургыжланеныт, мыйынат шӱмем пырткен. Сеҥыме нерген шоненат омыл ыле, но, Юмылан тау, пиал шыргыжале, мутым палышым. Финалыш, а вара супериграш лекмеке, автомашинам модын наламак шонышым. Паша дене кудалышташ пеш кӱлеш, адакшым машинам виктарыме стажемат изи огыл. Но улыжат ик мутшымак веле палышым. Мӧҥгысӧ кинотеатрат – сай пӧлек. Тудат ты куанле татым ӱмыр мучко шарныкташ тӱҥалеш.
Йокма деч посна нигузе
Ме палена, телепередачыш шукынжо пӧлек дене мият. Ты шотышто Екатеринат сайынак ямдылалтын: вареньым, шинчалтыме киярым, пелашыжын коптитлыме шылжым пыштен, а Леонид Аркадьевичлан марий тувырым лӱмынак налын. Канде экран воктене шинчыше-влак, очыни, Леонид Якубовичын марий вургемым чийымыжым вучышт, но … вучен ышна шукто.
– Мелнам авам ден ансамбльын участникше-влак кӱэштыныт. Сӱретче Иван Богомолов лӱмынак радынам ямдылен, марий Йӱштӧ Кугыза ден Лумӱдырым сӱретлен, – рашемдыш Екатерина.
Кум йочам ончен-куштат
Екатерина Александр пелашыж дене 17 ий пырля илат, кум эргым (Андрей 16 ияш, Богдан да Лев кок ияш) ончен-куштат.
Екатерина Яныкайсола ялысе ФАП-ыште фельдшерлан кудымшо ий тырша.
– Луымшо январьыште телепередачым уло еш дене ончышна. Съёмкышто лиймылан жап эртен гынат, чон вургыжын. Изи эргым мемнам пален налын да «Авай, авай, ончо, ончо, мый тыйым телевизорышто ужам!» манын, куанен воштылын, – палемдыш кум шочшан ава. – Такшым мый изинекак шонен пыштымым шукташак тыршем. Тиде ганат тыгак лекте! Шонымаш эреак шукталтеш, тидлан чот ӱшаныман да ончыко лӱддӧ кайыман!
Иктешлыме семын
Чолга, лӱддымӧ да шонымашке шуаш тыршыше еҥ-влаклан кӧра кундемна чаплана да калыкна нерген пӱтынь элыштына илыше-влак пален налыт. Тек тыгайышт шукырак лийыт!
Алевтина БАЙКОВА
Видео гыч скриным ыштыме