Лидия Шабдарова
Икымше канал дене «Поле чудес» передачыште пытартыш жапыште марий-влакым чӱчкыдын ужаш лиеш.
Кодшо кугарнян телепрограммыште Звенигово район Кужмарий селаште шочын-кушшо Галина Калининам ончыктеныт. Кызыт ӱдырамаш Йошкар-Олаште ила. Тудо Марий кугыжаныш университетын Физический культур да спорт факультетшым отличий дене тунемын пытарен.
– Мый тӱрлӧ группылаште тренировкым эртарем. Кызыт кок ияш Лев эргым дене декрет канышыште улам. Яра жап улмо годым шыл, пӱкш, коштымо саска, свежа фрукт, емыж, шоколад гыч пеледыш аршаш-влакым ямдылем, – шкеж дене палдарыш ӱдырамаш.
Галина «Поле чудес» передачыш йодмашым ик ий ончычак колтен. Тушечын ӱжмаш толмеке, вигак ямдылалташ пижын.
– Программыш марий калыкна дене лишкырак палдараш манын шонымаш дене каенам. Тидым кузе кертынам, туге ончыкташ тыршенам. Эфир деч ончыч тургыжланымашым шижын омыл, а передачым возаш тӱҥалмеке, вургыжланаш тӱҥальым. Садланак ик буквамак кок гана ойлен колтенам. Сеҥаш шонымаш лийын, но пиал мылам шыргыжалын огыл, – передачыште лиймыж нерген каласкалыш Галина.
6 мартыште ончыктымо эфир Ӱдырамашын тӱнямбал кечыжлан пӧлеклалтын. Галина пӧлек шотеш чодыраште погымо емыж-саскам, шке ямдылыме сийжым, пеледыш аршашым, ӱячам, тыгак Марий Элын гастрономий брендшым, «Царевококшайский окорокым», конден.
Ӱдырамаш-влакым 8 Март пайрем дене марла саламлен. А передачым вӱдышӧ Леонид Якубович тудым эсогыл шупшалын. Галина моткоч ӧрын, но шкежат тидым ышташ шонен, да шонымашыже шукталтын манын палемден.
Снимкыште: Галина Калинина ден Леонид Якубович
Фотом Галина Калининан воткыл лаштыкше гыч налме.
