Йошкар-Олаште Марий Эл Радион эртарыме « Идалыкысе муро-2024» фестивальыште «Онар, кынел!» муро йоҥген.
Фестиваль эртыме жапыште ончаш толшо-влак коклаште онлайн- йӱклымаш эртен. Иктешлымаш почеш сеҥышыш Пошкырт кундем Мишкан селасе Марий историй да тӱвыра рӱдерын тӱҥ специалистше Алексей Ибулаевын (Васли Ольош) йоҥгалтарыме мурыжо лектын.
Васли Ольошым самодеятельный автор да мурызо, марий семӱзгар-влакым шымлыше да шоктышо семынат палена. Фестивальыш кондымо «Онар, кынел!» мурым журналист , поэт да краевед Вячеслав Камилянов дене пырля ямдыленыт. Пошкырт велне чапымат налын шуктен, эсогыл тудым йоҥгалтарыме годым уло калык кынел шогалеш. Мурын шомакшат кызытсе жаплан моткоч келшен толшо.
Онар, кынел! Сита малаш,
Жап шуын калыклан полшаш.
Онар, кердетым кидыш нал
– Элна воктен тушман осал.
Семтаҥ:
Изай, чӱчӱ, шоляш, йолташ,
Кӱсле ӱжеш пырля лияш.
Айста, уэшын ушнена
Да юзо тулым олтена.
Нӧлтал вуетым, Чумбылат!
Вет калыкна ӱжеш, колат?
Кеч маленат тый ятыр ий,
Пеленет кодын юзо вий.
Семтаҥ:
Кынел, кынел, Мамич Бердей!
Да кычкырал уэшын:
«Эй! Толза воктеке, родо-влак!
Ме сарзе лийына адак!»
Семтаҥ:
Эй, Полтыш он, кынел тыят!
Уэшын он мемнан лият!
Воктенет лийына чылан
– Вуйнам она пу тушманлан.
Семтаҥ:
Онар, кынел! Сита малаш,
Жап шуын калыклан полшаш.
Онар, кердетым кидыш нал
— Мемнам темда тушман осал.
Снимкыште: А.Ибулаев.
Фотом А.Ибулаевын еш альбомжо гыч налме.
Светлана Носова ямдылен
