Тӱрлӧ чер ваштареш кучедалаш да таза илыш-йӱлам кучаш кумылаҥдыме мероприятий-влак кышкарыште 26 июнь — 2 июль Шодо рак деч профилактикым эртарыме арня семын палемдалтеш.
Шодо рак – бронхо але шодо паренхиме деч тӱҥалтышым налше осал пуалше чер.
Шодо рак дене черланыме деч икымше профилактике – тиде тӱжвач ончалмаште осалла койшо фактор-влакым кораҥдаш темлымаш. Онкологий дене черланыме лӱдыкшым иземдаш манын, тудым чылалан шотыш налман:
– тамакым шупшаш лучо идат тӱҥал, тыгай еҥ-влак воктенат ида кошт;
– черланен кертме амал профессий дене кылдалтын гын, лӱдыкшыдымылык техникым шуктыза;
– иммунитетым пеҥгыдемдыза – тазалыкым эскерыза, яндар южышто чӱчкыдынрак коштса, шуаралтса;
– бронхо-шодо системе дене кылдалтше инфекциян черым жапыштыже эмлыза, тудым хронический марте ида шукто. Инфекций деч аралалтме шот дене вакцинацийым эртыза;
– чыла эм ден витаминым врачын палемдымыж почеш гына йӱза;
– чын кочса, капкыл нелытдам эскерыза, таза илыш-йӱлам кучаш да физкультурлан жапым муаш тыршыза.
Шодо рак дене черланыме деч кокымшо профилактике – жапын-жапын тергалтмаш.
Онкологийым вияҥаш тӱҥалме йыжыҥыштак рашемдаш манын, чыла шымлымашым жапыштыже эрташ тыршыза. Тидым поснак шодо рак дене черланен кертме лӱдыкшӧ тӱшкаш логалше пациент-шамычлан ыштыман.
М.ИВАНОВА
Фотом интернет гыч налме
