Марий Элын Рӱдӧ сайлымаш комиссийжын данныйже почеш, икымше кечын, 17 сентябрьыште, 20 шагат жаплан республикыште чылаже 16,63% йӱклен. Вес семын каласаш гын, тиде – 88 тӱжемат 342 еҥ.
Эн кугу чолгалыкым Шернур районышто илыше-влак ончыктеныт. Тушто 30,49 % калык сайлымашке миен. Кокымшо верыште – Килемар район: 27,24 %. Кумшышто – Йошкар-Ола. Рӱдолаште чылаже 14,8 % калык икымше кечынак йӱклымашке ушнен. Мутлан, 82-шо №-ан участкышке 296 еҥ миен. 87-ше №-ан УИК-ыште изиш гына шагалрак, 290 еҥ, шке граждан порысшым шуктен.
Таче да эрла, 18-19 сентябрьлаште, йӱклышӧ-влакын чотышт кугурак лиеш, шонена. Молан манаш гын, каныш кече. А тугеже избирательный участкыш миен толаш еҥ-влакын жапышт ситышын лиеш…
