Кужэҥер район Салтакъял селаште лиймына годым Эвелина ден Руслан Леухинмыт дене палыме лийынна.
Ме утларакшым озавате ден мутнам вашталтышна. Эвелина тиде кундемыштак шочын-кушкын, йочасадыш коштын, школым тунемын пытарен, марланжат ик уремыштак илыше резылан лектын
– Пӧртнам 2020 ийыште, кумшо ӱдырнан шочмекыже, чоҥаш тӱҥалынна. Коронавирус эртыме годым, апрельыште, ме чыланат моҥгыштӧ шинченна, ме тунам ава, ача лийше дене иленна. Нунак мемнам суртым нӧлташ шӱкалтышым пуэныт. Мемнан шкенжынат шыгырыште илымына шуын огыл. Мыйын ача-авам окса дене полшеныт. Тыге ме чоҥымо материалым налынна. Ӱмаште пӧртнан негызшым ыштенна, – мане Эвелина Леухина.
Суртнам оньава ден ача лийшын оралтышт воктене чоҥенна. Тӱналтыште ме мландым изиш умбалнырак налаш шоненна, но илыш вес семын савыралын. тылеч посна пелаш ача-аваж деч торашке кайымыже шуын огыл. Тошто пӧртын кудывечыштыже шогышо тошто левашым, моло оралтым пуженна, олмешыже ум нӧлтенна. Пӧрт негызым кок кечыштак ыштен шуктенна. Варажым арболитовый блокым заказатленна. Нунын дене икымше пачашым оптенна. А пӧртнажым шкешотан «юж сурт» проект почеш чоҥымо. Пелашем тыгай пӧрт-влакым Москваште, Москва областьыште нӧлтымаште пашам ышта. Сандене пӧртнан негызшылан лач ты проектым налынна да шкаланна келыштаренна.
Эвелина шкеже шуко пачашан пӧртыштӧ илаш огеш йӧрате, чонжылан ик пачашанже утларак келша. Шуко икшыван лиймеке, кугурак суртым чоҥаш мутланен келшеныт. Кокымшо пачашыжым ава капитал полшымо дене нӧлтеныт. Ты пачаш каркасан, леведышым профнастил гыч ыштыме. А брусым ушештарыше оҥам налмеке, пӧртым тудын ден комыжленыт.
– Пӧртын планировкыжо тӱҥалтыште вестӱрлырак лийын. тыгайже утларакшым дачник-шамычлан келшен толын. Мыланна эре илаш йӧрышӧ кӱлын. Тыге прихожийым кугемденна, кухньым иземденна. Кокымшо пачашыште кум малыме пӧлем уло. Тидыжым лачак икшыве-влаклан келыштарыме. Кӧргӧ отделкым мый шке ыштенам: обойым клеитленам, кокмышо пачашым чиялтенам, молан манаш гын пелаш вес кундемышт пашаште лийын. Кокымшо пачашыш тошкалтышым ямдым налме, а пӧртлан тудым марием келыштарен. Пӧртым тӱжвачын коктын чиялтыме. Тыгак тӱрлӧ кырча-марча дене йолташ, изам полшеныт. Пӧртныштына вӱдыжгӧ огыл, мотокч сай. Кӱварым шокшемдыме, электрический манме кӱварым ыштыме. Суртым электрический котёл полшымо дене олтена, – каласыш озавате.
Леухинмыт ден эше икмыняр мутым вашталтымек, нунылан чыла сайым тыланымек, порын чеверласышна. Туге гынат тиде пӧртым урем гыч эше ятыр жап ончен шогышна, молан манаш гын тыгай проект почеш суртым кажне кеч ын от уж.
Михаил СКОБЕЛЕВ,
Лидия ШАБДАРОВА.
Михаил Скобелевын фотожо
