ТАЧЕ ЯЛЫШТЕ

Корно деч ӧрдыжтӧ илена гынат, вуйым огына шупш

«Корно деч ӧрдыжтӧ илена гынат, вуйым огына шупш»,- манеш Морко район Олыкъялын старостыжо, «Марий Эл Республикысе ялозанлыкын заслуженный пашаеҥже» И.Леонтьев.

Игорь Геннадьевич Олыкъялыште шочын да тыштак ӱмырешлан илаш, пашам ышташ кодын. Коло вич ий «Родина» колхозышто тракторым виктарен, механизаторын тыршымыжым аклен, кугыжаныш наградым кучыктеныт. Тӱшка озанлык-влак панкрутыш лекме пагыт Шале кундемымат авалтыде кодын огыл. Тыге Леонтьев паша деч посна кодын. Мом ыштет, оксам ыштен налаш Москвашке шумеш каяш пернен. Но туштыжат «шӧртньӧ курыкымак» сӧрен огытыл. Тыге ынде шке озанлык дене илашыже перна. Пелашыже, Софья Яковлевна, жапше годым тӱшка озанлыкыште тыршен, экономист, бухгалтер лийын, тыгак шке ялыштыже Н.Мухинын тоштерыштыже ик жап пашам ыштен. Ынде коктынат сулен налме канышыште улыт.

— Ме кызыт шке озанлык паша дене илена, — ойла Игорь Геннадьевич. – Ончычшо ушкалымат ашненна, ынде уке. Мом ойлаш, ялыште ынде ушкалым нигӧ ок кучо. Кӱркам, чывым, комбым, вьетнам урлык сӧснам, шорыкым, казам ашнена. Теле вашеш презым налына. Кодшо ийын пукшен ӧрдыктарен ужалышна, а ынде шкаланна шыллан ончен куштынена. Эше кумло кок омарта мӱкшна уло. Мӱкшыжым ондакше куд омартам шкенан ял гычак кумдан палыме пчеловод Анатолий Александров пуэн ыле. Тунам мый але мӱкш нерген сайынже паленат омыл. Эркын-эркын тудын дечын тунемым, мом ышта, мыят тудымак ыштем. Ынде, шонем, тиде пашан шуко ойыртемжым пален налынам да тений мӱй лектыш, кеч мемнан кундем нектарым ойырышо кушкыллан поян огыл, сай ыле.

Игорьын МТЗ-82 маркан тракторжо, тыгак тушко пижыкташ келшыше тӱрлӧо борудованийже улыт, сандене вольыклан кургым ямдылаш, пакчам  куралаш, пареҥге радам коклам пушкыдемдаш, тыгак моло пашам шукташ нимогай нелылык уке. Тылеч посна пошкудо-шамычланат йодмо почеш полшен шога.

Ме тудын озанлыкшым ончен савырнышна. Мӱкшотар пелен сурткайык ден вольыклан загон гайым келыштарен. Тыште мемнам кӱрка тӱшка йӱкланен вашлие, вьетнам урлык сӧсна-влак пеленыштак коштыт. Каза-влак пушеҥге кокласе укшерыште свежа ужар лышташым пуреденыт, шорык-шамыч нӧрӧ шудым кочкын коштыт. Загонын ик велжым чапле пӱя айлен. Тыште комбылан, лудылан ийын кошташышт, йӱштылашышт моткоч йӧнан. Пӱяште колат уло, коклан Игорь шкежат кидыш эҥыртоям куча. Мемнан тыште лийме жапыште кайыклудо-шамыч тӱшкан вӱд ӱмбач чоҥештен эртышт.

Икте чоным тургыжландара: ял эркын-эркын лунчырген толеш, самырык-влак илаш огыт код, ни пӱртӱс газ, ни корно уке. Лавыран годым тышке  трактор деч посна от логал. Мемнан мийыме кечынат эрдене изирак йӱр лийын каен ыле, сандене ялыш лӱдын-лудынрак кудалын пурышна.

В.СМОЛЕНЦЕВ

Авторын фотожо

 

       

Опубликовать в Одноклассники

Добавить комментарий