Чыла тӱлымеке гына
Транспорт средствым виктараш правам поген налмеке, мом ыштыман, кузе тудым угыч пӧртылтыман?
Н.Соколов
Медведево район.
Йодышлан Медведево районысо прокурорын кугурак полышкалышыже С.Белова вашештен:
— Водительын поген налме удостоверенийжым Корно правилым пудыртымылан чыла штрафым тӱлымеке гына пӧртылтат. РФ Правительствын 2018 ий 10 октябрьыште лекше пунчалже почеш, транспорт средствым виктараш праван действийжым чарымеке, водительский удостоверенийым пӧртылтымӧ радамыш вашталтышым пуртымо. Административный наказатлыме шот дене транспорт средствым виктарыме деч кораҥдыме лицалан ты правам палемдыме срок эртымеке гына пӧртылтат. Но тидын деч ончыч гражданинлан РФ МВД-н ГИБДД подразделенийыштыже, кушто тудлан административный наказанийым палемденыт, корно правилым палымыж шотышто тергымашым да тыгак медицине освидетельствованийым эрташ логалеш.
Водительский удостоверенийым пӧртылтымӧ годым гражданинын паспортшо але личностьшым пеҥгыдемдыше вес документше, пырля кугыжаныш да муниципал платеж-влак нерген кугыжаныш информационный системыште корно правилым пудыртымыжлан чыла штрафым тӱлымыжым пеҥгыдемдыше пале лийшаш.
Правам административный правонарушений шотышто постановленийым шуктышо ГИБДД подразделенийыштак пӧртылтат. Но гражданин тудым налаш йодмашым вес подразделенийышкат пуэн кертеш.
Илаш йӧра але ок йӧрӧ…
Садыште нӧлтымӧ пӧрт илаш йӧра але ок йӧрым кӧ да мыняр жап рашемда?
М.Иванова
Йошкар-Ола
Йодышлан Медведево районысо прокурорын кугурак полышкалышыже С.Белова вашештен:
– Сад пӧртым илыме пӧртлан да илыме пӧртым сад пӧртлан шотлымо радамым 2019 ий 1 январьыште илышыш пурышо РФ Правительствын пунчалже пеҥгыдемден. Тудо 2018 ий 24 декабрьыште лектын да 2006 ий 28 январьыште лекше «Пӧлемым илыме верлан, илыме верым илаш келшыдыме да шуко пачашан пӧртым аварийныйлан да тудым кораҥдаш але уэмден олмыкташ кӱлеш манын шотлымо нерген положенийыш» вашталтышым пуртен. Тидын дене келшышын сад пӧртым илыме пӧртлан, а илыме пӧртым сад пӧртлан шотлаш але шотлаш огыл пунчалым лукташ озаже йодмаш да 56-шо пунктышто ончыктымо кӱлеш документ-влак дене пырля верысе кучемын уполномоченный органышкыже лекшаш. А ты орган йодмашым налме деч вара 45 календарный кече деч вара огыл вашмутым пуышаш. Пунчал лукмо нерген уверым йодмашым пуышо еҥлан уполномоченный орган кум кече жапыште колтен шуктышаш. Йодмашым пуышо еҥ варажым тудым судыштат обжаловатлен кертеш.
Тыге лиеш мо?
Мариемым икымше гана судитленыт да эрык деч посна коденыт, общий режиман колонийыш колтеныт. Санденак пален налнем, тудым следственный изляторыштак наказанийым шукташ манын коден кертыт мо?
И.Викулова.
Йодышлан Марий Эл исправительный учрежденийлаште закон шукалтмым эскерыме шотышто Йошкар-Оласе прокурорын пашажым жаплан шуктышо Л.Букреева вашештен:
– РФ Уголовно-исполнительный кодексын 77-ше статьяж ден келшышын, исключительный случай годым эрык деч посна коден судитлыме лица-влак але марте ик ганат эрык деч посна кодалтын огытыл, а наказанийым общий режиман колонийыште эртышаш улыт гын, шкеныштын йодмышт почеш следственный изоляторыштак эртен кертыт.
Тыгай судитлыме еҥ-влак следственный изолятор але тюрьма начальникын пунчалже да судитлыме еҥын шкенжын возыман келшымашыж почеш изоляторысо озанлыкыште тӱрлӧ пашам шукташ кодалтыт.
С.Носова ямдылен
