ЮРИСТ УМЫЛТАРА

Юрист умылтара

Терген налыт

Школыш технический пашаеҥлан пурымо годым судитлалтме нерген справке кӱлеш маныт. Тиде тыгак мо?

Н.Верещагина

Советский район.

Йодышлан Медведево районысо прокурорын полышкалышыже С.Захарова вашештен:

— Образований сферыште пашам ышташ шонышо-влакын судимостьышт лийшаш огыл. Но тышке РФ Паша кодексыште палемдыме икмыняр случай ок пуро. Паша кодекс почеш могай пашаш судитлалтше да нунын шотышто уголовный делам тарватыман ен-влакым огыт нал, тугай пашаш пурымо годым нуно судитлалтше да судитлалтдыме улмышт але реабилитироватлыме амаллан кора уголовный преследованийым чарыме нерген справкым ончыктышаш улыт. Тыгай условийым образовательный организацийын педагогшо-шамыч веле огыл, тыгак технический, полышкалыше персоналат шуктышаш, вет нунат шке пашаштышт ийготыш шудымо-влак дене тӱкнат.

Мут кучаш логалеш

Наркотикан средствым пропогандироватлымылан мут кучаш логалеш мо?

Н.Соколов.

Йошкар-Ола.

Йодышлан Медведево районысо прокурорын полышкалышыже О.Лесовщиков вашештен:

— Наркотикан средствым пропогандироватлымылан административно мут кучаш шогалтат. «Наркотикан средстве да психотропный вещества-влак нерген» федеральный закон почеш наркотикан средстве дене пайдаланыме, тудым кузе ямдылыме да ыштыме йӧн-влак нерген уверым шаркалаш чаралтеш. РФ Административный правам пудыртымаш нерген кодекс почешат тидлан административный штрафым тӱлаш пуэн кертыт.

— граждан-шамычлан — 400 теҥге гыч 5 тӱжем теҥге марте. Тидын годым пропагандылан кучылтмо рекламе сатум да оборудованийым конфисковатлат;

— должностной лицалан — 40 тӱжем гыч 50 тӱжем теҥге марте. Тидын годым пропагандылан кучылтмо рекламе сатум да оборудованийым конфисковатлат.

— предприниматель пашам юридический лицам ыштыде шуктышо-шамычлан — 40 тӱжем гыч 50 тӱжем теҥге марте, тидын годым пропагандылан кучылтмо рекламе сатум да оборудованийым конфисковатлат але нунын пашаштым 90 сутка марте административно чарат, тидын годым пропагандылан кучылтмо рекламе сатум да оборудованийым конфисковатлат.

— юридический лица-шамычлан – 800 тужем гыч 1 миллион тенге марте, тидын годым пропагандылан кучылтмо рекламе сатум да оборудованийым конфисковатлат але нунын пашаштым 90 сутка марте административно чарат, пропагандылан кучылтмо рекламе сатум да оборудованийым конфисковатлат. Тыгаяк административный штраф-влакым психотропный, психоактивный у вещества-влакым пропагандироватлымыланат палемден керыт.

Вӱд – пӱртӱс поянлык

Шке мланде участкыште скважиным ыштымылан лицензий кӱлеш мо?

Е.Митяков

Йошкар-Ола.

Йодышлан Медведево районысо прокурорын полышкалышыже С.Захарова вашештен:

— Артезианский скважине гыч вӱдым налмым «Недр нерген» федеральный законын положенийже-влак регулироватлат. Законын 11-ше статьяж дене келшышын вӱдым скважине гыч налмылан разрешений лийшаш. Но тидын годым вӱдым налме вер шотышто ӱлнырак ончыктымо икмыняр условий шукталтеш гын, лицензий огеш кӱл:

— суткаште вӱдым налме кугыт 100 м³ деч утла лийшаш огыл;

— вӱдым налме верже централизироватлыме водоснабженийлан келыштарыме вӱд горизонт деч кӱшнырак лийшаш;

— вӱдым предприниматель пашалан огыда кучылт.

Лицензий деч посна недр дене пайдаланымылан административный штрафым пуэн кертыт. Тудын кугытшо граждан-шамычлан 3 тӱжем гыч 5 тӱжем теҥге марте, должностной лица-шамычлан 30 тӱжем гыч 50 тӱжем теҥге марте, юридический лица-шамычлан 800 тӱжем тенге гыч 1 миллион теҥге марте шуэш.

Лӱмын ӱжыкташ нимолан

Корно-транспорт происшествийыш логалме годым аварийный комиссарым эре ӱжман мо?

А.Зверева

Семёновко села.

Йодышлан Медведево районысо прокурорын полышкалышыже О.Г.Лесовщиков вашештен:

— Уке, огеш кӱл. Корно движений правилыште да корно движений лӱдыкшыдымылык шотышто федеральный законодательствыште аварийный

комиссар нерген умылымаш йӧршеш уке да тудын статусшат регламентироватлалтын огыл. Сандене аварийын комиссар корно-транспорт происшествийым оформитлыме, происшествийын схемыжым ыштыме годым закон почеш уполномочитлыме лицалан ок шотлалт да ты амал денак документым ыштыме годым тудым чынжымак кӱлеш семын ыштымылан нимогай ответственностьшо уке.

Корно движений правилын 2-шо пунктыштыжо ончыкталтын: корно- транспорт происшествийым оформитлымылан полиций пашаеҥ-влак гына вуйын шогат.

С.НОСОВА ямдылен

Опубликовать в Одноклассники

Добавить комментарий