Звенигово район Чакмарий кундемыште лийме годым эн ончычак села мучко эртышна. Канде леведышан Шнуй Тройчын лӱмеш черке вигак шинчалан перна. Тушто возымо: «Черке приходысо школын пӧртшӧ. 1872 ий. Кугыжаныш арала.»
1868 ийыште тудо кӱкшака верыште, курыкышто лийын, но 1939 ийыште петыреныт, а 1953 ийыште йӱлен.
– Ондак тиде оралтыште школ лийын, тӱҥалтыш классыштыже мыят тунемынам, – ойла Чакмарий школышто тӱҥалтыш классым туныктышо Галина Алексеевна Степанова. – Вара тӱҥалтыш школет черкысе приходым Варажым, 20-шо курымын 90-ше ийлаштыже, тӱҥалтыш классын оралтыжым кучылтын Шнуй Тройчын храмым ыштеныт. 2013 ий гыч бачышка – иерей Михаил ача (Михаил Репин). А ынде пеленже у черкым ышташ палемдыме.
А кызытсе Чакмарий школым 1976 ийыште чоҥымо. Тушко пурен лекде лиеш мо? Школ директор Владимир Геннадьевич Кашков мылам тунемме верысе Шарнымаш да Чап залым, Этнокультур рӱдерым, православий кабинет ден кӱсото лукым, тошто арвер-влакым да молымат уло кумылын ончыктыш.
– Мемнан кундемыште черкышкат коштыт, кӱсотыштат кумалыт, – ойла школышто марий йылмым туныктышо Антонида Аркадьевна Андреева умылтарыш.
Этнокультур рӱдер шотышто ойлаш гын, тудым тыште 2010 ийыште почмо, а православий кабинетым – 2012 ийыште.
– Православий урокым школыштына 2009 ий гыч эртараш тӱҥалме, – ойла Галина Алексеевна. – «Православий тӱвыран негызше» предметым ынде православий кабинетыште тунемына, тений сентябрь гыч тудо 5-9-ше классыште арнялан ик гана лиеш.
2019 ийыште Юл кундем федерал округышто «Туныктышын нравственный подвигшылан» конкурсышто Чакмарий школын коллективше духовно-нравственный воспитаний шотышто сеҥышын дипломжо дене палемдалтыныт, а 2021 ийыште эртыше «Серафимовский туныктышо 2020-2021ий» конкурсышто сеҥышын дипломжым туныктышо Галина Степанова лектын.
М.СКОБЕЛЕВ
Авторын фотожо
Снимкыште: 5847 Туныктышо Г.Степанова ден йоча-влак 5929 Корно черкышке конда 5762 Кӱсото 5789 Туныктышо А.Андреева
