Специальный военный операцийыште кредалше салтакна-влаклан посна еҥ-шамычат, организаций ден предприятий, коллектив, ушем-шамычат тӱрлӧ семын полшаш тыршат.
Мутлан, «Саскавий» марий ӱдырамаш ушем 23 февральыште палемдалтше Элым аралышын кечыже вашеш лӱмынак «Тыланет, марий салтак» акцийым увертарен. Тудын дене келшышын, тиде поро пашашке республикысе районла ден олала гыч кажне кумылан еҥ ушнен кертеш.
А тыгайже шагалын огытыл, коеш. Вет мый, мутлан, кодшо кугарнян тидым-тудым налын намийышым гын, тиде жаплан «Десантник-влакын ушемышт» регион-влак кокласе мер организацийын марий региональный отделенийжын Йошкар-Олаште Сеҥымашын ХХХ идалыкше лӱмеш тӱвыра полатын икымше пачашыштыже верланыше пӧлемыштыже посылке коробка, тыгак молымат посна пӱтырен пыштыме ӱзгар ден арвер моткоч шуко ыле. Молан лач тушко намийыман? Ты пашан тӱҥ организаторжо – тиде ушем.
«Саскавий» ушемын чумырымо поснак пале лийже манын, ӱдырамаш-шамычын погымо кажне коробкашке лӱмынак ушемын эмблемыжым пижыктыме. Мыйын мийымем годым вич посылке ыле. А эрлашыжым, шуматкечын, «Саскавийын» Советский районысо пӧлкаже гына эше шке семынже 7 коробкам чумырен конден! А вет южыжо чотак кугу! Могай нуно молодец улыт! Вараже, палдарыме почеш, ушем лӱм дене эше икмыняр посылке ешаралтын – посна еҥ-влак поро пашашке ушныде чытен кертын огытыл.
Мемнан коллектив гычат ик ӱдырамашым мокталтыман. Нина Васильевна Васильева шкетын кок коробка посылкым чумырен намиен!
Ойлымыж почеш, салтак-шамычлан тудо носким, перчаткым, ночко салфеткым, пӱй мушмо щеткым, пастым, чайым, кофем, шоколадым, печеньым, калачым, пряникым, вафльым наледен колтен. Адакшым чылажымат – икте дене веле огыл, шукак!
– А эше Аня уныкам 23 февраль вашеш Элнам аралыше-влакым саламлымашан открытке-серышым возен. Тудым посылкыш ӱмбакак пыштышна. «Ме ӱшанена: те сеҥымаш дене пӧртылыда! Ме тендам вучена!» манын возен да серыш йымалныже «Йошкар-Ола. Марий Эл» манын серен, – палдарыш Нина Васильевна да ешарыш: – Тек поро пашалан изинекак тунемеш. А шкеже серыш ӱмбаке рушла, вес велкыже марла тыге сералтышым: «Юмо арале тендам, эргына-влак!»
Акций кугарня марте шуйна, вет лач тунам Десантник-влакын ушемышт, чыла посылкым иктыш поген, салтак-влаклан наҥгая. Сандене кӧн салтак-влаклан кузе-гынат полшаш кумылжо уло, тидым эше ыштен шуктен кертеш.
– Кӧ ты пашашке ушнен, организатор семын чылаштым палемдыме шуэш. А тиде «Саскавий» марий ӱдырамаш ушем, Йошкар-Олаште илыше тыглай еҥ-влак, «Воин» общероссийский мер организацийын региональный мер организацийже. Поро кумылым ончыктымыштлан чылаштлан кугу таум ойлем, – палемдыш Десантник-влак ушемын председательже Марсель Фаткуллин.
Любовь Камалетдинова
Авторын фотожо
