УВЕР ЙОГЫН

Сӱретлаштыже – шочмо ялже!

Марий Турек поселкысо В.Мосолов лӱмеш краеведений тоштерыште эреак могай-гынат ончерым эртарат. Кажныже – моткочак ойыртемалтше да оҥай. Тидым ме тӱрыс пеҥгыдемден кертына, молан манаш гын икмыняржым шкеат ужынна, акленна да тидын нерген кугу куан дене возенна.

Шукерте огыл, 19 январьыште, уэш ик тыгай выставке почылтын. Тушко Семеновка ял гыч землякыштын, сӱретче Виталий Скородумовын, пашаже-влакым чумыреныт да еҥ-влаклан ончаш темленыт, палдарыш тоштер вуйлатыше Раиля Мухаметханова.

Ойлымыж почеш, выставке чынже денак  ойыртемалтше. Молан манаш гын, Виталий Павлович лачшымак шке шочмо ялжым гына: тусо сурт-оралте-влакым улшыштым, ончен, пытышыштым шарнен, тыгак тушто илыше-влакым  – сӱретла! Теве тудо могай кӱлешан сомылым шукта!

Тиде кечынак музейыште шкеж дене вашлиймаш эртен. Тушко поселкысо йоча сымыктыш школын тунемшыже ден туныктышыжо-влак, тыгак Марий Турек кыдалаш школ гыч ӱдыр-рвезе-шамыч миеныт. Сӱретче шкеже, илыш корныжо, пашаже-влак нерген каласкален, тыгак мастер-классым ончыктен.

А кӧ тиде уста еҥын сӱретше-влакым ужнеже гын, эше жапше уло, вет  выставке 31 март марте эртаралтеш.

Л.Камалетдинова

Фотом тоштерын сайтше гыч налме

Опубликовать в Одноклассники

Добавить комментарий