Волжский район Руш Шайра ялыш пурымо годым пылышлан эн ончычак мотопилан йӱкшӧ шоктыш: кок бригаде кафем ыштымаште тырша улмаш. Иктыже – Полатсола гыч, а весыже – Корамасын кидмастарже-влак. Кокымшыжын бригадирже каласыш:
– Сергей Осипов, Алексей Васильев да Владислав Васюков кафем шокшемдат.
– Кафем ыштыме шотышто шонымаш – пелашем Владимир Васильевичын, – каласыш Елена Харитонова. – Тудо тиде ял гычак. Ондак тыште ик изи пӧртым налме ыле. Эн ончычшо кугу оралтым ыштыме, кызыт воктеныже кафе ден каныме пӧртым нӧлтымӧ. Чылажымат кундемыштына илыше кидмастар-влак ыштат.
Мутланымашна сылне кафе пелен, вара у монча ончылно эртыш. « А мончам тыге сылнештараш шонымаш кӧн лийын?» йодмемлан Елена вашештыш:
– Пелашемынак. Тудо Озаҥыште ужмыжым илышыш пурташ тырша, эскизым ышта, интернетыште кычалеш, вара чылажымат келыштара да шкак сылнештара.
Чылажымат ончаш гын, суртозан мыняр пӱжвӱдшӧ йоген – тудо шкак гына пала. Теве пырдыжымат пу сорым пӱчкыш дене сӧрастарыме. Монча ончылно канаш чыла уло. Мутлан, ласкан шинчаш пӱнчӧ гыч ӱстембал, а пӱкен – лафет гыч. Ӱстелым эпоксид киш дене заливатлен да полироватлен шындыме – пеш моторын коеш. Толшо калыклан тыште келшыдежат ок керт, а еҥ-влак пӱтынь республикна гыч веле огыл, Озаҥ гычат толыт.
Суртозан саваржат, капкажат шинчамлан перныде ыш керт: чылажымат тошто семын авырен печен шындыме.
– Мемнан пашам умбакыже шочшына-влак шуят манын, моткочак ӱшанена, а кызыт нуно кертмышт семын полшат, – каласыш озавате.
М.СКОБЕЛЕВ
Авторын фотожо
