Марий Эл Юл кундем федеральный округын 14 субъектше коклаште офтальмологический полышым пуымо шотышто 1-ше верым налын.
Интегральный ранжированийым «Шинча микрохирургий» МНТК-н специалистше-влак эртареныт. Нуно «Тазалык аралтышын первичный звеножым модернизироватлымаш» регионысо проектым илышыш пуртымо кышкарыште медицине организацийлашке кызытсе оборудованийым налын шындымылан, чер нерген данный-шамычым погымылан, врач-влакын кадрыштым ситарымылан, хирургын пашажлан, диспансер эскерымашлан, эмлыме годым у технологий дене пайдаланымылан кугу тӱткышым ойыреныт.
Моско эксперт-влак марий офтальмолог-шамычын витреоретинальный хирургий – хирургический офтальмологийыште шинча пӱсылыкым пӧртылташ да арален кодаш полшышо ик эн пытартыш да пайдале направлений – дене сайын пайдаланымыштым, медицине пашаеҥ-шамычын квалификацийым нӧлтымыштым, эксперт классан оборудованийым налын шындымым, жап деч ончыч шочшо йоча-влакын шинчаштым (ретинопатийым) эмлыме шотышто программым илышыш пуртымым кӱкшын акленыт.
М.ИВАНОВА
Марий Эл Тазалык аралтыш министерствын фотожо
