Марий Элыште кажне ийын Юл эҥерын вӱд поянлыкшым тазаҥдыме паша шукталтеш.
Тений шыжымат Куйбышев водохранилище кумдыкышто, Звенигово районысо Кокшайск посёлко воктене, 4800 толстолобик изи колым колтеныт. Тудым Саратов областьысе Покровский питомникыште колын естественный средаште сайын иланен кертме кугытым погымо марте ончен куштеныт.
Республикын Янлык тӱня департаментшын вес уверже почеш, шукерте огыл Юлыш тыгак 14,5 тӱжем сазан, Чебоксар водохранилищыш 8 тӱжем сӱгыгол колигым колтеныт. Сазанжым У Торьял кундемысе кол питомникыште ончен куштеныт.
Тиде пашам ончыкыжымат шуят, вет вӱдыш колтымо кажне колиге –тиде кугу эҥерын волгыдо ончыкылыкышкыжо инвестиций да вӱд поянлыкшын ешаралт толмылан ӱшан. Тидым искусственно ышташ огыл гын, кол йӧршеш пытен кертеш. Санденак вӱд поянлыклан эҥгекым кондышо предприятий-влак кажне ийын Юлым колиге дене пойдарыме амал дене тидым компенсироватлат. Паша кузе шукталтымым Росрыболовствын комиссийже тӱткын эскера.
Снимкыште: кызыт толстолобик колжо тыгай изи веле.
Департаментын воткыл лаштыкше гыч налме фото-влак.
